Chega (dende casa) o espectáculo da choiva de estrelas das Líridas

Durante a segunda quincena de abril prodúcese a choiva anual de estrelas das Líridas, cando o noso planeta atravesa a nube de partículas que deixou fai máis dun século un cometa. O seu máximo será a noite do martes 21 ao mércores 22 e, con paciencia, poderase ver algunha cruzando o ceo cada 10 ou 15 minutos. Iso si, dende casa.

A choiva de estrelas das Líridas, que parecen proceder da constelación da Lira, pódese observar habitualmente cada ano entre o 16 e 26 de abril. Cando máis se verán neste 2020 será na noite do 21 de abril.

Nesta ocasión, do mesmo xeito que os eventos astronómicos que aconteceron desde que se decretou o estado de alarma polo coronavirus, haberá que ver estas ‘estrelas’ (en realidade non o son) desde casa, e armados de paciencia, pois se espera que apenas poida verse una cada 10 ou 15 minutos.

Os cometas, na súa órbita arredor do Sol, deixan ao seu paso un ronsel de xeo, po e rocas. A Terra, no seu percorrido anual arredor da estrela, cruza estas nubes de pequenas partículas, chamadas meteoroides. Cando estes atravesan a atmosfera terrestre, aparece unha intensa fricción que orixina os espectaculares ronseis luminosos que vemos sucando o ceo.

O rastro dun cometa que pasou en 1861

Durante estes días, estamos a atravesar a nube de partículas que o cometa Thatcher (C/1861 G1) deixou tras de si na súa última visita ao perigeo terrestre, en 1861.

Aínda que é posible que desde mediados ata finais de abril vexamos algún destes meteoros desintegrarse na atmosfera, o máximo da choiva de estrelas terá lugar a noite do martes 21 ao mércores 22 de abril, a partir das 23:00 horas.

Ademais, esa noite, a Lúa nova estará da nosa parte, para facilitarnos a fazaña de ver algunha “estrela fugaz”.

As choivas de meteoros reciben os seus nomes da constelación da que semella que emanan. As Líridas chámanse así porque o seu radiante (o punto do que parecen proceder) atópase na constelación da Lira, que poderemos identificar porque contén á estrela Vega, unha das máis brillantes do ceo nocturno.

Como curiosidade, na película Contact, o sinal extraterrestre que recibe o personaxe interpretado por Jodie Foster provén desde esa brillante estrela. Pero non será necesario que miremos cara a ela para ter a oportunidade de pedir desexos. Abondará con que fixemos a nosa vista nun punto calquera do firmamento e esperemos, pacientemente uns minutos.

Ao longo do ano pode haber ata 50 choivas de meteoros (escintileos de luz que emiten a partículas ou meteoroides), pero as máis significativas son as Cuadrántidas, as Perseidas e as Xemínidas.