Únete á nosa canle de Whatsapp
A sonda Hayabusa2, da Axencia Espacial Xaponesa (JAXA), cumpriu a pasada semana un dos principais desafíos da súa misión. Debía pousarse sobre o asteroide Ryugu, ao que chegou despois de varios anos de viaxe, e disparar unha bala de tántalo a 300 metros por segundo. O obxectivo era triturar a superficie de Ryugu para obter mostras e traelas de volta á Terra.
E a imaxe publicada este luns pola JAXA parece confirmar o éxito: mentres a Hayabusa2 ascende, vese unha parte da superficie do asteroide algo ennegrecida, unha cor que non estaba nas imaxes previas.
Entre abril e maio agárdase unha nova detonación de Hayabusa2 no asteroide. Se todo vai segundo o previsto, unha carga explosiva máis potente provocará un cráter en Ryugu, e del tomaranse mostras de rocha que non estiveran expostas á erosión espacial.
E unha vez cumprido o obxectivo, a finais deste ano, espérase que a sonda poña rumbo cara a Terra. Unha vez cerca do planeta, a finais de 2020, liberará a cápsula coas mostras tomadas estas semanas, cuxa caída está prevista en Australia. A Hayagusa2 seguirá desprazándose polo espazo, xa que conservará enerxía suficiente para achegarse a outros corpos susceptibles de seren explorados.
