Susana Bayo e Juan Antonio Añel, investigadores do grupo Ephyslab no campus de Ourense, volvían de xantar, arredor das 15 horas deste mércores, cando viron algo abraiante no ceo. “Eu nunca o vira”, confesa Susana. Coma eles, máis persoas en Galicia puideron contemplar este mediodía a particular imaxe, que ten o nome de “arco da vella de lume” ou “arco circunhorizontal“. Parécese ao arco da vella, máis habitual, pero a súa orixe e explicación é lixeiramente distinta.
“Ten que verse un tipo de nube concreta, os cirros, que están compostas de cristais de xeo se ubican nunha altura de entre 6.000 e 12.000 metros. E ademais, o Sol debe atoparse nunha parte bastante alta”, explica Susana Bayo. Ao atopármonos preto do solsticio de verán, as condicións cumpríanse, ao poder incidir a luz de forma horizonal sobre os cristais de xeo, aínda que o arco da vella de lume estivo a punto de agocharse debido á presenza de nubes máis baixas, tal e como recollen as imaxes tomadas por Bayo e Añel.
Regalo meteorológico. Arco iris de fuego o arco circunhorizontal @aetherlux #fermoso @OTempoTVG #Ourense @Tiempo_Mercedes @mbarreiro_tve @Xavi_Fonseca @4gotas_com pic.twitter.com/piGFquznzj
— Susana Bayo Besteiro (@Su_Bayo) 5 de xuño de 2019
Condicións moi axeitadas
Nun artigo publicado pola Sociedade Galega de Historia Natural, o responsable da sección de Astronomía da entidade, Paulino Gasalla, engade tamén a condición de que “a temperatura en capas altas da atmosfera sexa moi baixa, por iso son máis frecuentes en países fríos, pero nunca máis ao norte ou ao sur dos 55º de latitude, e os avistamentos serán máis probables cando máis próximos nos atopemos ao solsticio de verán”. As de hoxe eran, por tanto, condicións propicias para que se producira, debido ao aire frío que trae consigo a cicloxénese explosiva Miguel.
Este arco da vella de lume ou arco circunhorizontal adoita ser retratado en diversas partes do mundo nas contadas ocasións nas que se produce. E ás veces, dependendo da forma dos cirros nos que se refracta a luz solar, poden adoptar aparencia de lapas, de aí o seu alcume “de lume”, tal e como se pode ver nestas imaxes.
