A Axencia Espacial Europea (ESA) difundiu este xoves as primeiras fotografías que a misión Solar Orbiter, lanzada a comezos de 2020, realizou da superficie estelar. As imaxes tomáronse a uns 77 millóns de quilómetros de distancia do Sol, aproximadamente a medio camiño entre a Terra e a estrela.
As imaxes revelan, segundo a ESA, novos fenómenos que non se puideran observar detalladamente. Son as chamadas ‘fogueiras’ (campfires, en inglés),”unhas parentes das xa coñecidas laparadas solares, pero millóns de veces máis pequenas”, explica David Berghmans, do Real Observatorio de Bélxica (ROB), investigador principal do instrumento EUI (Extreme Ultraviolet Imager), que toma imaxes de alta resolución das capas inferiores da atmosfera do Sol, coñecida como corona solar. “O Sol podería parecer tranquilo a primeira vista, pero cando miramos con detalle podemos ver esas fogueiras en miniatura en moitos lugares”, engade Berghmans. Por agora, non é posible saber cal é a orixe deste fenómeno, aínda que poderían contribuír a un dos mecanismos máis sorprendentes do Sol: o feito de que a coroa, a capa máis externa da ‘atmosfera’ solar, estea a unha temperatura moito maior (un millón de graos centígrados) que a superficie (uns 5500 ºC).
Explica Frédéric Auchère, do Institut d’Astrophysique Spatiale (IAS) de Francia, e tamén investigador do EUI, que “estas fogueiras son totalmente insignificantes individualmente, pero engadindo o seu efecto no conxunto do Sol, poderían ser a contribución dominante ao quecemento da corona solar”.
“É evidentemente demasiado pronto para contalo, pero esperamos que conectando estas observacións con medidas dos nosos outros instrumentos que perciben o vento solar ao pasar a nave espacial, acabaremos sendo capaces de responder a algúns destes misterios”, afirma Yannis Zouganelis, outro dos investigadores do proxecto Solar Orbiter na ESA.
Outro dos instrumentos utilizados na misión, o PHI (Polarimetric and Helioseismic Imager), encárgase de facer medicións de alta resolución nas liñas do campo magnético da superficie solar, e está deseñado para analizar as rexións activas da estrela, zonas cuns campos magnéticos especialmente fortes que poden dar lugar ás laparadas solares. Cando se producen estes fenómenos, o Sol libera feixes de partículas enerxéticas que potencian o vento solar que emana constantemente da estrela no espazo circundante. Cando estas partículas interaccionan coa magnetosfera da Terra, poden provocar tormentas magnéticas que poden perturbar as redes de telecomunicacións e mesmo eléctricas.
Máis detalles, no web da ESA (en inglés): Solar Orbiter’s first images reveal ‘campfires’ on the Sun.
