Este 29 de marzo estaba previsto que as astronautas estadounidenses Christina Koch e Anne McClain realizasen un paseo espacial exclusivo de mulleres. Pero non poderá ser. Porque a NASA recoñeceu que lle falta un traxe espacial de talle mediano, polo que de momento o paseo o vai facer Koch cun compañeiro home.
Ata agora os protagonistas dos paseos espaciais dende a Estación Espacial eran só homes ou equipos mixtos de homes e mulleres, pero a principios de mes a NASA anunciou que por primeira vez realizarían unha excursión espacial exclusivamente feminina. O obxectivo era instalar unhas baterías novas. Pero os plans da NASA truncáronse “en parte” por falta de traxes para as astronautas, segundo recoñeceu este luns a axencia espacial nun comunicado, onde se sinala que McClain “descubriu durante o seu primeiro paseo espacial –que realizou a semana pasada– que o traxe de tamaño mediano (en concreto, a camisa do traxe espacial) quedáballe mellor que a do tamaño grande“. Como de aquí ao venres só estará dispoñible un torso dese talle, este o usará a súa compañeira Koch, que fará a saída ao espazo xunto ao seu colega masculino Nick Hague.
Pola súa banda, o seguinte paseo de McClain está programado provisionalmente para o 8 de abril. Unha das claves desta zarangallada espacial está no feito de que a NASA non ten o número de traxes que precisaría para facer os paseos espaciais. Os recortes orzamentarios na axencia espacial estadounidense fixeron que lle falten varios talles dispoñibles para o torso e para as pernas. Algúns destes traxes están na Terra en reparación e os que hai dispoñibles na Estación Espacial obrigan a facer encaixe de Camariñas para organizar cada camiñada no exterior.
De calquera xeito, este paseo espacial non era tan importante, malia que a NASA o vendera como un fito histórico. Porque a primeira muller en realizar unha camiñada espacial foi a cosmonauta soviética Svetlana Savitskaya hai 35 anos. Ao longo da historia, máis de 500 persoas estiveron no espazo, pero menos dun 11% foron mulleres. Cando McClain participou na súa camiñada espacial a semana pasada, converteuse na décimo terceira muller en facelo, e Kocha será a 14, segundo a NASA. O seu paseo conxunto terá que esperar.
E aquí podes ler a historia de Svetlana Savitskaya, a primeira muller en dar un paseo espacial:
Sentímolo pola NASA: Svetlana deu o primeiro paseo espacial en 1984
