As formas que a auga debuxa ao deslizarse polo planeta son desde hai miles de anos unha fonte de inspiración para a arte. Desde hai anos, o fotógrafo Milan Radisics percorre o planeta para completar o seu proxecto Water.Shapes.Earth, no que recolle a beleza que pode desvelar o líquido elemento nun enfoque que oscila entre a arte abstracta e o documental. Nas súas viaxes, Radisics tamén parou en Galicia, con dúas imaxes que recollen, por unha banda, o encontro da auga doce co mar; e por outra, a pegada que o ser humano pode deixar a través da súa actividade, alterando o curso previsto pola natureza. Son, respectivamente, imaxes da ría de Betanzos e da balsa de lodos da multinacional Alcoa en San Cibrao.
Ría de Betanzos
Na primeira das imaxes, tomada en xullo de 2015, Radisics explica como a marea baixa revela o leito lamacento de pequenos regatos, cunha disposición que lembra ás espiñas dun peixe. O fotógrafo lembra que a zona, situada no esteiro da ría de Betanzos, viuse influenciada pola construción de estanques artificiais construídos no pasado, no que foi un dos centros pesqueiros e comerciais máis importantes do antigo reino de Galicia. Porén, posteriormente os sedimentos que foron enchendo o esteiro dificultaron o tránsito marítimo na zona.
Alcoa
A imaxe da balsa de San Cibrao corresponde a outro dos capítulos da obra do fotógrafo, que analiza a pegada humana no planeta. Explica Milan Radisics que “o lodo vermello” da balsa “é un produto de refugallo altamente alcalino, composto principalmente do óxido de ferro que se xera na produción industrial da alúmina (óxido de aluminio) que a multinacional Alcoa transforma na planta lucense.
O resto das imaxes do proxecto poden verse nesta ligazón.
