Venres 29 Marzo 2024

Vilagarcía e O Milladoiro, nas áreas de restricións polo aumento de casos de Covid-19

Sanidade estende a máis rúas de Ourense as medidas máis estritas que xa estaban vixentes na cidade, e mantenas no resto de concellos

Todo o termo municipal do concello de Vilagarcía de Arousa e a do Milladoiro, en Ames, engádense á lista de restricións impostas pola Consellería de Sanidade por mor do aumento de casos de Covid-19. Ademais, despois da reunión do comité clínico que asesora á Xunta de Galicia no marco da pandemia, ampliouse o ámbito de medidas máis restritivas na cidade de Ourense (que rexía en parte do barrio do Couto) a unha área máis ampla, onde non se poderán xuntar nin no eido público nin o privado os grupos de máis de cinco persoas.

No caso de Ourense, contará con medidas especiais o ámbito territorial delimitado polas rúas do Progreso (desde a Ponte Romana ata o cruzamento coa rúa Praza de Abastos), a rúa Irmáns Xesta, a avenida de Portugal (ata cruzamento coa rúa Irmáns Xesta), o camiño Lobisome, rúa do Salto do Can, rúa Carballo, rúa Sobreira, N-525 (dende o cruce coa rúa Sobreira ata o cruzamento coa avenida Ribeira Sacra), avenida Ribeira Sacra ata a Ponte Romana, incluídas estas rúas nos tramos sinalados.

Publicidade

Zona con maiores restricións en Ourense. Fonte: Google Street View/Sanidade/Elaboración propia.
Zona con maiores restricións en Ourense. Fonte: Google Street View/Sanidade/Elaboración propia.

Nesta área, que afecta a boa parte da cidade de Ourense, quedan prohibidas as reunións privadas ata un máximo de cinco persoas e a prohibición de que bares e cafeterías poidan servir no interior, limitándose a atender nas terrazas a grupos de cinco persoas. Os restaurantes poden servir no interior a un máximo de cinco persoas por mesa.

No Milladoiro, a Xunta informou a media tarde de que as medidas afectan a toda a localidade, despois de expoñer, nun primeiro momento, que se cinguían á zona preto da avenida Rosalía de Castro, principal vía de entrada e saída ao Milladoiro. Así, as restricións na localidade iguálanse as xa vixentes noutras áreas de Galicia, con limitación da capacidade ao 50% nos establecementos comerciais, de restauración e hostalaría -onde ademais estará prohibido o consumo en barra-, a limitación do número máximo de persoas nas xuntanzas tanto privadas como na vía pública fixado nun máximo de 10 persoas; así como a redución da capacidade máxima en locais destinados a celebracións, velorios e lugares de culto.

Así queda o mapa de limitacións no conxunto de Galicia.

Así, o Comité clínico aconsella manter as medidas vixentes nos outros concellos: Santiago, Silleda, Lalín, Lugo, Ourense, Poio, Pontevedra, Vilaboa, Marín e Verín, así como en parte da cidade da Coruña.

Área aproximada na que se manteñen as limitacións na cidade da Coruña. Fonte: Google Maps / Elaboración propia cos datos da Consellería de Sanidade.
Área aproximada na que se manteñen as limitacións na cidade da Coruña. Fonte: Google Maps / Elaboración propia cos datos da Consellería de Sanidade.

Todas estas medidas publicaranse na tarde do mércores no Diario Oficial de Galicia e entrarán en vigor á medianoite, volvendo revisarse nun prazo máximo de sete días. Segundo expón a Consellería, a intención “é poder actuar de xeito más selectivo e con maior rapidez ante a aparición de casos nunha zona concreta”, acoutándoas “o máis posible, podendo restrinxirse e regularse determinadas actividades xa non por áreas sanitarias, senón por concellos, cidades ou mesmo barrios”.

Casos activos

Sanidade achegou tamén a información diaria sobre a evolución da pandemia en Galicia. Engadíronse á serie 251 casos, que suman un total de 22.489 infeccións detectadas desde febreiro. Destas persoas, 4.460 están como casos activos. A maioría (4.211) están no domicilio, mentres que 32 están na UCI e 217 noutras unidades de hospitalización. Esta é a situación nos hospitais galegos, onde segundo datos do Ministerio de Sanidad, a ocupación de camas con pacientes de Covid-19 é de arredor do 3%.

Por áreas sanitarias, esta foi a evolución desde comezos de agosto. Nos últimos días constátase un aumento en Pontevedra, na que tamén se enmarca Vilagarcía de Arousa, que xa é a segunda área en número de casos e a maior en incidencia por 100.000 habitantes nos últimos días, mesmo superando á Coruña. A provincia de Ourense tamén incrementa os casos por mor do brote detectado na residencia de maiores de Lobeira.

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Sanidade ordena a retirada dun coñecido fármaco para a diabetes

A AEMPS comunicou que os motivos se relacionan por un defecto de calidade que “non supón un risco vital para o paciente"

Galicia rexistra 16.000 novos casos de cancro e 8.000 mortes cada ano

A Fundación CRIS reúnese con Sanidade para solicitar unha maior cobertura aos pacientes oncolóxicos que requiren de medicamentos CAR-T

A falsa endemia de malaria e outros intentos para desecar a lagoa de Antela

A partir do século XVIII a zona húmida foi considerada inimiga da agricultura. Os veciños intentaron evitar o desaugamento das terras que utilizaban para o pastoreo

Funcionan os novos fármacos para deixar de fumar? “Se non cambias a conduta, a posibilidade de recaída é alta”

Mónica Pérez Ríos, investigadora da USC, explica que estes medicamentos teñen unha pauta de consumo de 25 días