Únete á nosa canle de Whatsapp
O número de positivos por Covid-19 detectados na comarca da Mariña lucense nos últimos días ascende a 18, segundo informou na tarde do venres a Consellería de Sanidade. O Sergas confirmou a existencia doutros catro casos na comarca, vinculados a Burela, e fala de “dous focos de Covid-19 activos na comarca da Mariña”, ao tempo que “avalía a posibilidade” de que os dous brotes (Burela e Xove) “estean relacionados entre sí, polo que segue a investigar todas as posibles relacións entre eles para determinar este feito”. O Ministerio de Sanidad informou, pola súa parte, de 4 positivos notificados no día anterior desde Galicia. Dos 36 diagnósticos realizados nos últimos 14 días, 26 producíronse na última semana, como se pode ver baixo estas liñas.
Tal e como informou o mércores Sanidade, a Plataforma de Vixilancia e Control Epidemiolóxica e polos Servizos de Medicina Preventiva e Saúde Pública do Sergas detectou o pasado martes no concello de Xove un primeiro caso de Covid-19, a partir do cal se iniciou un rastrexo de contactos co que se analizaron as persoas que estiveron preto do probable foco de infección, tal e como apuntan os protocolos acordados polo goberno central e os autonómicos.
Desde a detección do primeiro positivo, activouse de forma inmediata o protocolo de seguimento e realizáronse as probas PCR a todos os contactos estreitos deste positivo e dos sucesivos, actuacións que se seguen a desenvolver nestes momentos, pois tanto a Consellería de Sanidade como o Servizo Galego de Saúde seguen a investigar e a rastrexar todos os contactos dos novos positivos, así como a adoptar todas as medidas necesarias para o eficaz control do brote.
Sanidade apunta a que a maioría dos 18 casos son asintomáticos ou presentan síntomas de carácter leve, tal e como recollía este venres o xornal El Progreso, que contactou cun dos afectados e recolleu as chamadas á precaución dos alcaldes da comarca. Con todo, unha das persoas con resultado positivo está ingresada no Hospital Público da Mariña. Tanto os casos positivos como o resto das persoas en contacto con estes casos deberán gardar corentena durante 14 días, e permanecerán baixo seguimento da plataforma de vixilancia do Sergas. Ata o momento, o servizo de saúde rastrexou a máis dun cento de persoas relacionadas con este brote e séguense a investigar posibles novos contactos.
Ata o de agora, a Consellería non informou de novos positivos no outro rebrote confirmado na última semana en Galicia, o da comarca do Barbanza. Hai nove casos confirmados e arredor dun cento de persoas baixo seguimento.
Rastrexadores da Covid-19: o equipo que protexerá Galicia dos futuros brotes
Casos activos
Pola súa parte, a Dirección Xeral de Saúde Pública da Consellería de Sanidade informou, como fai a diario, do número de casos activos en Galicia. Son 311 (22 menos có xoves), dos que 81 son da área da Coruña, 31 da de Lugo, 21 da de Ourense, 8 da de Pontevedra, 133 da área de Vigo, 26 da de Santiago, e 11 da de Ferrol. As altas concentráronse na área da Coruña-Cee, con 21 casos activos menos que o día anterior. Catro persoas están hospitalizadas e o resto están atendidas no domicilio. Nas residencias de maiores só se manteñen como casos activos 4 usuarios e 1 profesional. Xa superaron a infección 10.590 persoas, e faleceron 619. Desde hai dúas semanas non se rexistran novos falecementos. Con todo, os servizos de Microbioloxía seguen realizando, segundo os datos que achega a Consellería de Sanidade, máis de 1.000 probas PCR diarias. Este venres súmanse 171.518 desde o comezo da crise.
