Únete á nosa canle de Whatsapp
España rexistrou 637 mortos con coronavirus en 24 horas. Trátase do menor número de vítimas mortais nun só día desde o 24 de marzo. O total de falecidos elévase a 13.055, segundo informou o Ministerio de Sanidade. Hai máis de 135.000 contaxiados contabilizados oficialmente, case 60.000 hospitalizados e 40.000 recuperados.
Aínda que todo indica a que España está a empezar a dobregar a curva de mortos e infectados por Covid-19, a realidade é que dende esta fin de semana é o país onde a pandemia do coronavirus está a ser máis mortífera. Xa lle custou a vida a 265 persoas por cada millón de habitantes, segundo os datos deste domingo.
España superou xa o nivel de Italia, país onde comezou a expandirse o brote por Europa. O país transalpino ve xa con claridade os efectos das medidas de illamento da poboación e o número de falecidos aumentou este domingo en 525, a taxa máis baixa desde o 19 de marzo, ata os 15.887.
Máis de 1,2 millóns de persoas contaxiáronse no mundo co coronavirus, case 70.000 morreron e preto de 263.000 curáronse, segundo o reconto da Universidade Johns Hopkins. En Xapón, onde se rexistraron máis de 100 mortes e case 5.000 contagios, o primeiro ministro, Shinzo Abe, planea declarar o estado de emerxencia debido a un significativo aumento dos casos, medida que pode anunciar este luns, segundo a prensa local.
O primeiro ministro británico, Boris Johnson, ingresado nun hospital para someterse a probas, 10 días despois de dar positivo, “segue ao mando”, segundo declarou un dos seus ministros.
Mentres tanto, o novo coronavirus continúa coa súa expansión mundial. En Asia preocupan especialmente Irán e Turquía, e en África, os países van contabilizando aos poucos un leve pero continuo aumento de casos.
O número de persoas na UCI por coronavirus baixa por primeira vez en Galicia
O foco da pandemia xa non se atopa na provincia chinesa de Hubei, onde foi detectado por primeira vez a finais de 2019 e onde xa apenas se rexistran contagios locais, senón que a pandemia atravesou as fronteiras chinesas a un ritmo imparable.
Estados Unidos, con máis de 300.000 casos diagnosticados, é o novo epicentro, ao converterse no país do mundo con máis positivos identificados. O virus tamén vai infectando á poboación doutros países americanos. Canadá é o segundo país deste continente con máis positivos, seguido de Brasil, Chile, Ecuador, México, Panamá e Perú. O resto de Estados latinoamericanos rexistran cada día varias decenas de infectados baixo o constante temor de que o ritmo de novos contaxios, do mesmo xeito que Europa, comece a aumentar de xeito exponencial.
Aquí podes ler os últimos datos do Ministerio de Sanidade
