España rexistra 864 mortos con coronavirus en 24 horas, segundo o Ministerio de Sanidade, un novo máximo diario, e o quinto día que se superan os 800 falecementos.
Os datos oficiais amosan que se acumulan 9.053 falecidos e máis de 102.00 contaxiados desde o inicio da crise sanitaria. Máis de 22.500 persoas recuperáronse e máis de de 51.000 requiriron hospitalización (case 5.900, na UCI, un incremento do 5% con respecto ao martes).
En Italia, onde case 12.500 persoas morreron desde o inicio da crise, o ministro de Sanidade, Roberto Speranza, confirmou que se estenderán as medidas de confinamento 10 días máis, ata o 13 de abril. A pandemia afectou a máis de 860.000 persoas no mundo e deixa máis de 42.000 mortos, segundo a Universidade Johns Hopkins, cuxo reconto revela que Estados Unidos superou esta madrugada os 4.000 falecementos.
Neste panorama, a pandemia expándese a velocidade nos Estados Unidos (preto de 200.000 contaxiados) e con Trump repetindo agora as palabras de mandatarios de Europa días atrás: “As vindeiras dúas semanas serán moi, moi difíciles”.
O secretario xeral da ONU, António Guterres, afirmou que o coronavirus é a crise “máis difícil” á que se enfronta o mundo desde a II Guerra Mundial, ao tempo que pediu un plan para contrarrestar os impactos socieconómicos da pandemia. “Por unha banda, é unha enfermidade que representa unha ameaza para todos no mundo e, por outro, ten un impacto económico que traerá unha recesión sen precedentes probablemente no pasado recente”, sinalou Guterres nunha rolda de prensa virtual de Nacións Unidas.
Aquí podes consultar o último informe do Ministerio de Sanidade
