Desde as 19.30 horas deste xoves, a través das canles de GCiencia en Facebook e Youtube, o doutor Juan Gestal participará nun encontro en directo para analizar a situación da pandemia da Covid-19, desde a aparición dos primeiros casos a comezos de 2020 ata a perspectiva actual, co comezo da inmunización en parte da poboación.
Juan Jesús Gestal Otero (Muros, 1947) é licenciado en Medicina pola Universidade de Santiago de Compostela (1970) e doutor en Medicina pola Universidad de Navarra (1974). Durante a súa carreira ocupou cargos como a xefatura de sección no hospital da Coruña e no hospital xeral de Santiago, xefe de servizo de Medicina Preventiva no Hospital Clínico Universitario de Santiago, a subxefatura provincial de Sanidade da Coruña ou a Dirección Xeral de Saúde Pública da Consellería de Sanidade.
No eido académico, en 1988 acadou a cátedra de Medicina Preventiva e Saúde Pública na USC, da que actualmente é profesor emérito despois da súa xubilación. Foi tamén decano da Facultade de Medicina entre 2011 e 2017. Dirixiu máis de 50 teses de doutoramento e acadou numerosos recoñecementos de institucións europeas e hispanoamericanas.
Durante este ano, o profesor Gestal foi unha das voces máis consultadas polos medios de comunicación para analizar o curso da pandemia en Galicia. Na semana na que se declarou o estado de alarma, e ante a rápida transmisión detectada en zonas como Madrid ou o País Vasco, Gestal avanzou que se acabarían aplicando (como aconteceu apenas un día despois) as mesmas medidas en Galicia. Ademais, formou parte do grupo de expertos en Saúde Pública que remitiu á revista The Lancet dúas cartas nas que se pedía ao Goberno español e as comunidades autónomas a necesidade dunha avaliación independente da xestión da pandemia.
