GCiencia estrea este domingo un novo proxecto audiovisual. Trátase do Dicionario da Ciencia, que durante as próximas 15 semanas analizará dunha forma desenfadada outros tantos termos científicos ou relacionados coa ciencia. O formato será similar ao da primeira entrega, lanzado en 2020, tamén baixo a coordinación de Eduardo Rolland e conducido pola actriz Déborah Vukusic, convertida nunha profesora de Ciencias encargada de desenvolver os distintos conceptos.
A nova tempada do Dicionario iníciase cun capítulo dedicado ao Lucecú. Os contidos teñen unha duración aproximada de dous minutos, e están creados para achegar a un público xeneralista conceptos científicos e o seu correcto emprego en galego. A serie conta co apoio da Secretaría Xeral de Política Lingüística, a través do Fondo de Proxectos Culturais Xacobeo 2021.
A importancia de normalizar o uso do galego nun ámbito especialmente delicado está na orixe do Dicionario da Ciencia. A imposición de extranxeirismos, a constante actualización terminolóxica e a necesaria exactitude e falta de ambigüidade fan do correcto uso do galego un factor fundamental de normalización, ademais dunha útil ferramenta para a expansión do idioma propio de Galicia.
O proceso de normalización do galego científico é crucial para que os seus falantes perciban que todos os contidos de calquera tema poden ser comunicados nesta lingua e sintan a ciencia como algo próximo. Trátase dun traballo con distintas vertentes, como a que afecta a léxicos e vocabularios e na que caben incluso propostas puntuais.
