Hai lugares no mundo investidos dun encanto especial polo feito de seren o punto do primeiro amencer ou solpor dunha área xeográfica. No caso de Europa ese punto non é único, debido a que as condicións de iluminación solar do planeta mudan durante o ano.
Tal percorrido solar vai definindo unha serie de cinco localizacións ao longo da súa costa atlántica continental: Cabo de São Vicente e Cabo da Roca (Portugal), Costa da Morte (Galicia) e Aglapsvik e Måsøy (Noruega), irmandadas así por esta circunstancia astronómica, que lles engade un novo atractivo turístico.
A xornada, dirixida polo catedrático da USC Jorge Mira, basease no seu traballo de investigación A última posta de sol na Europa continental publicado na revista ‘Cartography and Geographic Information Science’, incluída entre as de máis impacto no ámbito temático da Xeografía.
Celebrarase o día 24 de marzo, data sinalada por ser dende ela ata o 24 de abril cando se pode contemplar na franxa Cabo Touriñán-Cabo Fisterra na Costa da Morte o último solpor da Europa Continental e tamén dende o 18 de agosto ao 19 de setembro.
Nesta xornada, ademais de debullar os detalles xeográficos, abordaranse as posibilidades de desenvolvemento turístico asociadas á singularidade que une eses lugares.
Será no Consello da Cultura Galega en Santiago de Compostela, dende as 9:30 da maña ata as 18:00.
Máis información nesta ligazón do Consello da Cultura Galega
