O destino turístico Ancares-Courel (Lugo) presenta un patrimonio natural, excepcional en Galicia, que unido a unha boa xestión do recurso e á promoción dun tipo de turismo sostible e desestacionalizador, fan que este espazo natural sexa, un ano máis, recoñecido por Observer e distinguido como “Mellor destino de montaña 2023”. A xeoloxía, a botánica e os seus ceos escuros, sen contaminación lumínica, distinguen e explican a singularidade do territorio.
Observer, entidade especializada na identificación e promoción de destinos de turismo científico, outorgoulle en 2019 a certificación de destino de turismo científico ás Montañas de Ancares e Courel, que agora ven revalidado o distintivo. Observer que conta na actualidade con máis de 400 destinos en toda España, na súa maioría en Galicia, continúa deste xeito sumando e reafirmando espazos á súa oferta turística de destinos non só interesantes, senón sostibles.
O patrimonio dende a divulgación
Segundo explican, hai varios aspectos importantes, á parte do patrimonio natural e cultural, a considerar á hora de valorar un bo destino de turismo científico. Os contidos divulgativos, como rutas e guías, a interactividade, a accesibilidade, o persoal capacitado e as instalacións son só algúns deles. Os destinos turísticos certificados por Observer ofertan habitualmente actividades como visitas guiadas, charlas de expertos, e dispoñen de contidos para que os visitantes poidan comprender e valorar máis o que están visitando.
O turismo científico é un tipo de turismo no cal os viaxeiros visitan lugares relacionados coa ciencia e a tecnoloxía, xardíns botánicos, parques temáticos e museos de ciencias, observatorios e tamén espazos naturais singulares, coma este das montañas de Ancares e Courel. O obxectivo, sempre, é descubrir o patrimonio natural e cultural desde perspectivas non só paisaxísticas, senón tamén divulgativas.
Como explican desde a xerencia de Observer, trátase de poñer en valor a ciencia que hai detrás de moitos dos espazos turísticos que habitualmente son visitados.
