Un proxecto colaborativo entre o Centro de Investigación en Nanomateriais e Biomedicina (Cinbio) da Universidade de Vigo (UVigo) e a Universidade de California, en San Diego, pode ter aplicacións na medicina personalizada nun futuro próximo.
“A investigadora Nicole Steinmetz proporciónanos unhas estruturas proteicas, que son virus mosaico da planta do tabaco, e nós, desde aquí, incluímolas nunhas estruturas híbridas que tamén son magnéticas”, explica Verónica Salgueiriño, líder do grupo de Nanomateriais Híbridos do Cinbio. “A idea é ter uns sistemas que sexamos capaces de guiar magneticamente para, a continuación, liberar as biomoléculas, fármacos ou xenes que estean nas cápsulas proteicas dos virus”, engade.
As achegas do Cinbio
Malia que son virus os que se utilizan para esta investigación, son patóxenos de plantas e, polo tanto, non son activos e non poden enfermar os humanos. Mais o que si demostra esta investigación é que o ARN destes virus se pode liberar con control espazo-temporal nunha zona moi particular dunha célula. Isto pode ter grandes aplicacións na medicina personalizada.
“Imaxinemos que eu fun capaz de incluír aquí unha serie xenética que ti queres que unha célula incorpore. Nós, con estes sistemas híbridos, podemos transportala, protexela coas cápsulas proteicas destes virus de plantas e, cando se considere que alcanzaron o núcleo da célula, liberalas para que se mimeticen con ela”, sinala Salgueiriño.
Esta investigación pode ser clave para a medicina personalizada. As enfermidades teñen casuísticas distintas dependendo da persoa que as sufra e isto permitiría un tratamento personalizado e exclusivo para cada paciente.
