Un robot capaz de coidar as persoas maiores ou un coche autónomo que non precise da condución humana para procesar e entender os sinais de tráfico. O futuro está aquí e o obxectivo co que os investigadores conciben os robots non é outro que mellorar a nosa calidade de vida e alixeirar as tarefas cotiás. Pero non todo é doado, e aínda queda moito por facer para conseguir unhas máquinas o máis autónomas posible. Así o expón o investigador Richard Duro no terceiro episodio de O Descodificador, un pódcast de GCiencia en colaboración co CITIC. No capítulo Que son os robots autónomos? Riscos e beneficios para o futuro falamos do proxecto PILLAR-Robots, que lidera Duro dende o centro de investigación coruñés, pero tamén desmontamos moitas falsas crenzas que se difunden en medios e redes sociais sobre o futuro da robótica.
De feito, o investigador do CITIC critica as mensaxes catastrofistas que difunden unha idea vil da intelixencia artificial, sobre todo tras o auxe de Chat GPT. “É unha ciencia en cueiros”, asegura Duro, e insta a ser realistas. De momento, os robots autónomos están nunha etapa moi inicial e moi afastada das profecías máis apocalípticas. O proxecto que lidera, PILLAR-Robots, busca precisamente maximizar a autonomía destas máquinas en varios campos de actuación, como a industria, a educación e o entretemento, e a agricultura, susceptibles de ampliarse. Isto e moito máis, neste novo episodio de O Descodificador, onde Duro reclama maior divulgación contra os prexuízos da robótica.
Episodio realizado por Laura Filloy
Edición: Carlos Tresandí
Escoita O Descodificador nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
