A Unión Europea aprobou en xuño deste ano unha proposta de lei para regular a intelixencia artificial. Agora, os países membros están en plena negociación da normativa co obxectivo de que poida entrar en vigor, como moi tarde, en 2026. De conseguilo, será a primeira lei do mundo en regular esta tecnoloxía de rápida expansión e crecemento, que xa está presente nas nosas vidas cotiás e laborais. Con esta medida pioneira, a Unión Europea quere garantir a seguridade da cidadanía, pero… Precísase esta medida? Abordamos esta cuestión no cuarto episodio de O Descodificador, un pódcast de GCiencia en colaboración co CITIC. Neste capítulo, titulado É realmente necesaria unha lei sobre intelixencia artificial?, falamos con Patricia Faraldo, doutora en Dereito na Universidade da Coruña.
Neste cuarto episodio, a investigadora resolve todas as dúbidas xurdidas arredor desta proposta e o seu futuro como primeira lei de intelixencia artificial do mundo. Para evitar quedar obsoleta, regula usos e non tecnoloxías, e prohibe expresamente algunhas prácticas, como o recoñecemento facial das emocións por entender que atenta contra os dereitos humanos. Do que Faraldo non ten dúbida é da importancia desta futura lei e da súa aprobación, amplamente reclamada polo sector. Tamén explicará como se combaterá a través desta medida lexislativa as fake news e os dereitos de autor. E finalmente, analizará por que é tan importante adaptar a norma europea a cada unha das realidades dos países membros, especialmente no que respecta a España e o seu contexto.
Episodio realizado por Laura Filloy
Edición: Carlos Tresandí
Escoita O Descodificador nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
