A creación de vacinas e a reciclaxe de plásticos teñen máis en común do que imaxinas. A simple vista pode parecer unha relación complexa, pero nada máis lonxe da realidade. O grupo de Viroloxía Molecular do Centro de Investigación en Química Biolóxica e Materiais Moleculares (CiQUS) da Universidade de Santiago deseñou unha innovadora tecnoloxía de etiquetaxe molecular de proteínas que permitiu, ata o de agora, o desenvolvemento de dúas vacinas de interese veterinario —contra a lingua azul e contra a peste equina africana—. Tamén están a traballar nun método de degradación de plásticos baseado, precisamente, nesta nova técnica.
No novo episodio do podcast de GCiencia en colaboración co CiQUS falamos co investigador Jose Martínez Costas sobre a tecnoloxía nacida no laboratorio que el dirixe.
Escoita O podcast de GCiencia en todas as nosas plataformas de podcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser
