Minutos antes das 21 horas deste martes 12 de febreiro, numerosas testemuñas declararon a través das redes sociais ter visto un meteoro a atravesar o ceo de Galicia. Desde Viveiro, A Coruña, Corcubión, Verín ou Catoira, e tamén desde outros puntos do norte da Península, como Torrelavega, Gijón ou León. Entre eles, Manuel Vicente, director do programa Efervesciencia da Radio Galega.
Acabo de ver algo no ceo agora que coido que pode ser un bólido. Desde Catoira no coche en dirección norte. @RedSpmn
— Manuel Vicente (@efervesciencia) 12 de febrero de 2019
O director do Observatorio Astronómico Ramón María Aller da USC, José Ángel Docobo, confirmou o paso do meteoro. “Aquí en Santiago tamén se viu cara ao noreste, en clara baixada. Ten toda a pinta de que toda a traxectoria do bólido foi xa sobre o Mar Cantábrico“, de aí se deduce o avistamento desde toda a franxa norte da península.
Nos últimos meses foron varios os bólidos localizados polo observatorio. Na tardiña do 30 de novembro, varias persoas fixéronse tamén eco do paso dun meteoro no noroeste da Península, aínda que as nubes impediron a súa detección desde moitos puntos de Galicia.
Neses días, o Observatorio da USC deu a coñecer a gravación doutro meteoro localizado o xoves 25 de outubro polas cámaras que o organismo ten en Santiago de Compostela. José Ángel Docobo expuxo que o obxecto pasou ao leste de Galicia, posiblemente polo norte de Castilla y León, desde o sur cara ao norte. As cámaras rexistraron o seu paso ás 19.03 do día 25.
