En pleno inverno, Galicia está rexistrando estes días temperaturas máis baixas ca as principais capitais escandinavas. Mentres en Reykjavik, Oslo, Estocolmo ou Copenhague superan os 0ºC durante case toda a xornada, algunhas localidades do interior de Lugo e Ourense, sobre todo nos vales, acadaron mínimas de -8º. Un frío propio doutras latitudes.
Segundo os datos da rede de MeteoGalicia, houbo en Verín -8,3º, en Calvos de Randín -8,1ºC; en Xinzo -6,1ºC; en Bóveda -6,1ºC; e en Ordes -5,4ºC. E estiveron baixo cero moitas outras zonas. Ademais, os mapas publicados pola axencia reflicten como os bancos de néboa persistentes, especialmente no val do Miño e de Lemos, impediron o ascenso das temperaturas máximas. Así, na xornada de onte, o valor máximo acadado en Bóveda foi de 1,3ºC. En Portomarín apenas se chegou aos 2,8ºC e en Lugo, aos 3,7ºC.
En contraste, por riba dos 900 metros de altura apenas se caeu durante a noite dos cero graos. O único lugar foi O Invernadoiro con -1,3º. Pero nos cumios de Trevinca, O Cebreiro, Ancares ou O Courel, houbo menos frío.
Menos frío nas alturas; por que?
Despois de varios días co anticiclón estacionario sobre a península Ibérica, con pouco vento, pouca humidade no aire e noites largas, en Galicia estase vivindo un episodio de inversión térmica, caracterizado pola presenza en alturas medias dunha capa de aire máis quente e, por tanto, menos denso. Con ceos despexados, o solo perde calor rapidamente durante a noite e arrefríase, polo que a superficie queda cunha temperatura máis baixa ca as capas superiores.
O frío 🥶e as xeadas ❄️ foron de novo intensos na madrugada. Destaca tamén a inversión térmica. Temperatura máis alta nas montañas que nos vales. Lugo: -6ºC en Rozas ou Bóveda, +7ºC en Ancares ou Courel. Ourense: -8ºC en Verín ou Calvos, +6ºC en Xurés +4ºC en Cabeza de Manzaneda. pic.twitter.com/MZvvhjOak4
— MeteoGalicia (@MeteoGalicia) 4 de enero de 2019
Así, limítase a circulación do aire, e o frío fica nas zonas máis baixas. En zonas con moita actividade urbana e industrial, este fenómeno pode dar lugar a episodios de contaminación que poden afectar á saúde, xa que os gases nocivos non ascenden pola troposfera e concéntranse na superficie.
O anticiclón favorece a inversión térmica: a temperatura é máis baixa nos vales que en zonas altas.
👉 Na sondaxe da Coruña desta pasada medianoite obsérvase moi ben unha forte inversión térmica. pic.twitter.com/YozUJs1W4B— AEMET_Galicia (@AEMET_Galicia) 3 de enero de 2019
Normalmente, durante o día, o calor do Sol rompe esta inversión e a temperatura ascende. Porén, no caso dos lugares onde se forman brétemas, a situación pode persistir; e isto provoca, coma estes días, temperaturas moi baixas no interior de Galicia.
