Únete á nosa canle de Whatsapp
Máis de medio século de exploración espacial provocou que toneladas de lixo (unhas 7.600, calcula a Rede de Vixilancia Espacial dos Estados Unidos) estean dispersas en milleiros de obxectos que orbitan arredor da Terra, movéndose a grandes velocidades. Cómpre telos controlados polos posibles danos que causarían de impactaren contra satélites e outros obxectos en funcionamento. E xorden tamén ideas sobre como “limpar” o espazo deste lixo. Unha das máis ambiciosas é RemoveDebris, unha misión de satélites que probará catro experimentos, entre eles un arpón, para capturar estes refugallos.
A universidade británica de Surrey, que coordina o proxecto no que participan Airbus e outros centros de investigación espacial de Países Baixos, Suíza, Francia e Sudáfrica, fixo público esta semana que probaran con éxito o arpón. A ‘lanza’ espacial, deseñada por Airbus, foi disparada a 20 metros por segundo desde a nave principal de RemoveDebris cara a un panel de satélite situado no extremo dunha vara. E conseguiu atravesar o panel.
“Este é o experimento máis esixente que fixemos ata agora, e foi un éxito”, dixo Guglielmo Aglietti, director do Centro Espacial de Surrey. “RemoveDebris achega probas sólidas do que se pode acadar coa colaboración: unir a experiencia da industria co eido da investigación para lograr algo verdadeiramente notable”.
Esta proba supón o terceiro éxito para o proxecto. Xa se usara anteriormente a rede de a bordo para capturar unha peza simulada de lixo espacial cunha rede, e tamén se conseguiu identificar refugallos mediante un sistema de navegación co visión LIDAR e cámaras.
Despois do arpón, RemoveDebris prepara o seu experimento final, que terá lugar en marzo, co que intentarán inflar unha vela que arrastrará ao satélite cara a atmosfera da Terra para provocar a súa desintegración.
Chris Burgess, enxeñeiro de Airbus, dixo que “a demostración exitosa no espazo da tecnoloxía de arpóns é un paso importante cara a solución do crecente problema do lixo espacial”.
