Únete á nosa canle de Whatsapp
Este luns 8 de outubro, coincidindo coa celebración do Día da Ciencia, a Real Academia Galega de Ciencias e GCiencia presentaron o número 37 do Anuario da Ciencia en Galicia, que editan de forma conxunta. A revista, dispoñible en papel e en formato dixital, sae de novo á luz despois da aposta lanzada o pasado ano pola RAGC, que supuxo a apertura dunha nova etapa na revista anual da Academia, tendo en conta a súa traxectoria histórica, pero tamén adaptada ás necesidades dos novos tempos.
A publicación recolle, en 64 páxinas, algunhas das novas e achados máis relevantes para a ciencia en Galicia nos últimos 12 meses. Alén disto, inclúe unha serie de artigos que abordan a vida e a obra de Domingo Fontán, o autor da Carta Xeométrica, e que este ano foi homenaxeado como Científico Galego do Ano por parte da RAGC. Do mesmo xeito, inclúense artigos de académicos como Ángel Carracedo, Alicia Estévez, Antonio Rigueiro ou Juan José Nieto Roig, ademais do presidente da Academia, Miguel Ángel Ríos.
Do mesmo xeito, a revista inclúe as novidades institucionais da Academia de Ciencias, con información sobre o ingreso dos novos académicos (Pilar Bermejo, José Antonio Redondo e Wenceslao Fernández Manteiga), as actividades de divulgación científica e os certames convocados pola RAGC ao longo destes 12 meses, como o Premio Galicia de Xornalismo Científico, o premio de comunicación universitaria Contar a Ciencia-la Caixa, os premios de investigación Ernesto Viéitez o os de Transferencia de Tecnoloxía en Galicia.
Podes ler aquí o Anuario da Ciencia en Galicia.
– Versión en PDF: A Ciencia en Galicia 2018 (ligazón para descargar).
– Versión web: acienciaengalicia2018.gciencia.com.
