Os modelos indican que o furacán Melissa poderá chegar a Europa a comezos da próxima semana. De facelo, sería en forma de borrasca, en dirección entre Irlanda e ao sur de Islandia. O ciclón deixará de ter as características de furacán e de tropical, polo que realmente cambiará por completo a súa disposición.”En principio non chegará a Galicia“, aclaran desde MeteoGalicia, malia que aínda é cedo para saber a dirección exacta.
Desde Meteored explican que certas previsións europeas consideran que a borrasca non se achegaría tanto a Europa. “Pero axudaría a reforzar os ventos sobre o continente”, destacan. En calquera caso, non suporá un problema para Galicia, que xa está a soportar unha borrasca que provocou a activación da alerta amarela por choivas no interior, oeste e suroeste da Coruña, en toda a provincia de Pontevedra e no sur de Ourense. Ademais, tamén hai activa xa unha alerta amarela por ondas do mar nas Rías Baixas, na Costa da Morte e no noroeste da Coruña.
A partir do domingo recuperará pouco a pouco a influenza das altas presións. Haberá ceos nubrados con chuvascos ocasionais, máis probables na metade norte. De momento, MeteoGalicia prevé máis estabilidade para o luns: non chovería durante a maior parte do día.
O furacán Melissa
O furacán Melissa xa causou estragos en diversos puntos do Caribe. O país ao que chegou con máis forza foi Xamaica, con ventos de ata 298 quilómertos por hora que golpeou a unha poboación duns 2,8 millóns de habitantes. É unha das tormentas máis fortes xamais rexistradas e que xa deixou 19 mortes en Xamaica e 30 en Haiti.
O fenómeno meteorolóxico tamén deixou a miles de cidadáns con casas, coches e rúas esnaquizadas. Ademais, deixou sen electricidade ou auga a miles de cidadáns de países como Cuba e República Dominicana, onde xa hai un morto.
