Únete á nosa canle de Whatsapp
A NASA lanzou onte un nanosatélite ao espazo exterior, como parte dunha misión histórica para que os humanos volvan pisar a Lúa. O diminuto módulo Cislunar Autonomous Positioning System Technology Operations and Navigation Experience (CAPSTONE) lanzouse con éxito no foguete Electron de Rocket Lab desde o leste da península de Mahia, en Nova Zelandia. Se todo vai ben, indican os investigadores, en catro meses CAPSTONE estará en posición de comezar innovadoras “órbitas de halo case rectilíneas” ao redor da Lúa.
A misión ten como obxectivo axudar a reducir o risco para futura naves espaciais mediante a validación de tecnoloxías de navegación innovadoras e a verificación da dinámica desta nova órbita en forma de halo, arredor da Lúa. Desta forma, permitiría que os próximos foguetes lanzados ao espazo determinen a súa localización sen ter que depender do seguemento desde a Terra. Ademais, como parte do mesmo proxecto, Estados Unidos quere poñer a primeira muller e a primeira persoa de cor na Lúa. A NASA tamén busca construír unha base lunar e usar a experiencia como un trampolín para un voo tripulado a Marte.
CAPSTONE nunha nova órbita lunar
Cun peso similar ao dunha maleta, o satélite está a probar unha nova órbita que permitirá estacionar naves máis grandes, incluída a estación espacial “Gateway“, que viaxará ao redor da Lúa durante 15 anos e servirá como punto de partida para a súa exploración. A órbita pasa a 1.600 quilómetros (1.000 millas) da Lúa, no seu punto máis próximo, antes de catapultarse a 70.000 quilómetros (43.500 millas) como máximo. Ademais, os científicos esperan que esta traxectoria, utilizando a atracción tanto da Lúa como da Terra, consiga minimizar o uso de combustible. Tal e como indica a NASA dende a súa páxina web, CAPSTONE usará a súa propia propulsión e a gravidade do Sol para navegar cara ao seu destino e, aproximadamente, tardará catro meses en alcanzar a órbita lunar obxectivo.
O Sistema de Posicionamento Autónomo Cislunar da misión é un sistema de comunicacións e navegación de nave espacial a nave espacial que traballará co Orbitador de Recoñecemento Lunar da NASA para determinar a distancia entre as dúas bases en órbita lunar, sen depender do apoio e segemento desde a Terra. CAPSTONE tamén conta cunha nova capacidade de alcance unidireccional de precisión integrada no seu radio que podería reducir a cantidade de tempo de rede terrestre necesario para as operacións no espazo. Deste modo, se todo sae como se espera, conseguiríase unha maior experiencia en pequenos lanzamentos á Lúa e, incluso, máis alá no espazo.
