A lúa chea de marzo, ou Lúa de verme —un dos múltiples alcumes que adopta o astro nesta fase durante este mes—, poderá observarse este mediodía ás 13.40 desde Galicia, segundo o Observatorio Astronómico Nacional. Porén, a noite dos días 6 e 7 amosarase igualmente neste estado, que se produce cando este satélite e o Sol están en lados opostos da Terra. Tamén se coñece como a Lúa de savia, a Lúa do corvo, a Lúa da cortiza, a Lúa de azucre ou, polo sobrenome europeo, a Lúa de coresma, todos relacionados co fin do inverno.
O Farmer’s Almanac comezou a compilar e publicar os nomes outorgados polas tribos nativo americanas desde 1930, de xeito que se popularizaron entre a poboación global. Segundo esta publicación estadounidense especializada en prediccións meteorolóxicas, un dos máis populares era o de Lúa do verme: “A medida que a temperatura comeza a calentarse e o chan a desconxelarse, aparecen vermes de terra, que anuncian o regreso dos paparroibos”. As tribus máis ao norte chamábana Lúa do corvo cando o graznido dos corvos sinalaba o final do inverno; ou a Lúa da cortiza porque a capa de neve endurécese ao desconxelarse durante o día e conxelarse durante a noite.
O sobrenome de Lúa da coresma pertence aos europeos —os colonos, para as tribos nativo americanas—, que a consideraban como a última lúa de inverno por ser a que precede ao período anterior á Pascua. Outros nomes son a Lúa da casta ou a Lúa da morte, en relación co xaxún da Coresma. Ademais, o satélite coincide nestas datas co festival hindú Holi.
O astro continuará o seu ciclo o que resta de mes. Estará en cuarto menguante o 15 de marzo ás 04.38; en Lúa nova o 21 de marzo ás 18.23, e en cuarto crecente o 29 de marzo ás 04.32.
