Planando sobre Titán

Créditos da imaxe: Cassini Radar Mapper, JPL, USGS, ESA, NASA.Explicación: como sería sobrevoar Titán? As imaxes de radar procedentes da sonda automática Cassini da NASA en órbita ao redor de Saturno foron compiladas dixitalmente para simular como sería un voo. A Cassini precipitouse varias veces no pasado na lúa máis anubrada de Saturno desde que chegou ao planeta anelado en 2004. O voo virtual que se exhibe aquí amosa numerosos lagos en cor negra e terreo montañoso en cor dourada. As rexións da superficie das que se carece información vertical polo miúdo aparecen máis chairas, mentres que as rexións suficientemente cartografadas teñen a súa altitude estirada dixitalmente. Entre as baías visualizadas está o Kraken Mare, o meirande lago de Titán que ten uns 1.000 quilómetros de longo. Os lagos de Titán son diferentes aos lagos da Terra en que están compostos de hidrocarburos con semellanzas ao gas natural líquido. Como se formaron os lagos de Titán e por que sobreviviron segue a ser un tema de investigación.