Explicación: que estruturas escuras xorden desde a nebulosa Pelicano? A nebulosa Pelicano, que pode ollarse coma unha nebulosa con forma de paxaro precisamente cara a constelación dun paxaro (Cygnus, o Cisne), é un lugar punteado con estrelas recén formadas pero lixadas de po escuro. Estes grans de po do tamaño do fume formáronse nas atmosferas frías de estrelas noviñas e espalláronse polos ventos estelares mailas explosións. Poden verse impresionantes chorros Herbig-Haro emitidos por unha estrela á dereita que está a axudar a destruír o piar dun ano luz de lonxitude que o contén. A imaxe publicada foi coloreada cientificamente para salientar a luz emitida polas pequenas cantidades de nitróxeno, osíxeno e xofre, ionizados, da nebulosa que está feita sobre todo de hidróxeno e helio. A nebulosa Pelicano (IC 5067 e IC 5070) está a uns 2.000 anos luz de distancia e pode atoparse cun telescopio pequeno ao norleste da brillante estrela Deneb.
Piares e chorros na nebulosa Pelicano
