Explicación: onte, un cometa pasou moi pretiño de Marte. De feito, o cometa C/2013 A1 (Siding Spring) pasou máis preto do planeta vermello do que pasara calquera outro cometa preto da Terra nos rexistros históricos. Para tirar vantaxe desta oportunidade única e estudar a interacción entre un cometa e un planeta, a humanidade ten actualmente cinco naves espaciais activas orbitando Marte: as MAVEN, MRO, Mars Odyssey da NASA, así como a Mars Express da ESA maila Mars Orbiter da India. A maior parte destas sondas espaciais están agora a enviar información de que non foron danadas por anaquiños do cometa. Estas naves espaciais, así coma os dous todoterreos activos sobre a superficie marciana (os Opportunity e Curiosity da NASA), tomaron datos e imaxes que serán descargadas na Terra durante as semanas vindeiras e, probablemente, estudiadas nos próximos anos. Porén, a fotografía publicada que se tirou onte non foi tomada desde Marte senón desde a Terra e amosa o cometa Siding Spring na parte inferior esquerda mentres pasa preto de Marte, na parte superior dereita.
