Explicación: esta aparición interestelar, inchada polo vento procedente dunha estrela masiva, ten unha forma sorprendentemente familiar. Catalogada coma NGC 7635, tamén é coñecida simplemente coma a nebulosa Burbulla. Ainda que semella delicada, a burbulla de 7 anos luz de diámetro ofrece a evidencia de procesos violentos funcionando. Por riba e á esquerda do centro da burbulla hai unha estrela quente de tipo O, varios centos de milleiros de veces máis luminosa e unhas 45 veces máis masiva co Sol. Un fero vento estelar unha intensa radiación procedentes desa estrela arrincaron a estrutura de gas brillante empurrándoo contra o material máis denso da nube molecular que a arrodea. A intrigante nebulosa Burbulla e o complexo asociado están a só 7.100 anos luz de distancia cara a fachendosa constelación Casiopea. Esta imaxe definida e sedutora da burbulla cósmica é unha composición de datos do Telescopio Espacial Hubble de 2016, reprocesados para presentar a potente emisión en banda estreita da nebulosa nun esquema de cores case verdadeiros.
