Explicación: agás polos aneis de Saturno, probablemente a nebulosa do Anel (M57) sexa a argola celeste máis famosa. Porén, pénsase que a súa aparencia clásica se debe á nosa propia perspectiva. O cartografado recente da estrutura 3-D da nebulosa en expansión, baseada en parte nesta clara imaxe do Hubble, indica que a nebulosa é relativamente densa, cun anel con forma de rosquilla envolvido ao redor da metade dunha nube de gas brillante con forma de balón de fútbol (americano). A vista desde o planeta Terra apunta cara abaixo do eixe longo do anel conforma de balón, de fronte. Por suposto, neste exemplo ben estudado de nebulosa planetaria, o material brillante non procede de planetas. En vez diso, a envoltura gasosa representa as capas máis externas expulsadas desde unha estrela de tipo solar que morreu, agora unha pequena alfinetada de luz que se olla no centro da nebulosa. A intensa luz ultravioleta que procede da quente estrela central ioniza os átomos do gas. A nebulosa do Anel ten aproximadamente un ano luz de diámetro e está a 2.000 anos luz de distancia.
