Explicación: o cometa Catalina (C/2013 US10), cruzando os ceos setentrionais, fixo o seu achegamento máis próximo o 17 de xaneiro, pasando a uns 6 minutos luz do noso fermoso planeta. O cometa, coas colas de ións e po separadas claramente nesta fotografía desde a Terra, tamén posou para un momento Messier, preto da liña de visión de M101, a gran galaxia espiral na Osa Maior. M101, unha tarabela cósmica abaixo á esquerda, ten case o dobre de tamaño cá nosa propia galaxia Vía Láctea, pero a uns 270 mil séculos luz de distancia. Tanto a galaxia coma o cometa son obxectivos relativamente brillantes e doados para observadores do ceo equipados con prismáticos. Pero o cometa Catalina está agora a saír do interior do Sistema Solar e atenuarase paseniñamente nos vindeiros meses. Este mosaico telescópico de dous paneis abarca uns 5 graos (10 lúas cheas) do ceo.
