Venres 29 Marzo 2024

Unha investigadora da Coruña descobre a primeira alga vermella coralina de río

A investigadora da Universidade da Coruña Viviana Peña Freire vén de presentar á Ciencia a primeira alga vermella coralina de auga doce, nun traballo de investigación feito en colaboración con outros once investigadores de cinco institucións europeas. Peña Freire acaba de publicar o seu descubrimento na revista Scientific Reports, versión open-access de Nature. A investigadora pertence ao grupo de investigación BIOCOST da Facultade de Ciencias.

A nova especie, Pneophyllum cetinaensis Kaleb, Žuljević & V. Peña, atopada unicamente nun río kárstico de Croacia (río Cetina), está completamente adaptada ao medio doceacuícola e é incapaz de sobrevivir incluso en augas salobres. O descubrimento desta especie desafía o paradigma das algas vermellas coralinas como un grupo exclusivamente mariño. No artigo explícase a posible orixe mariña desta especie cuxo ancestro puido quedar illado polas oscilacións batimétricas do nivel do mar, a derradeira hai 20.000 anos cunha baixada do nivel do mar de 120 metros.

Publicidade

Viviana Peña pertence ao grupo BIOCOST da Universidade da Coruña

Agárdase que este artigo produza un impacto significativo en áreas de investigación tan diversas como, por exemplo, a Paleobioloxía, pois este grupo de natureza calcárea e cun rexistro fósil importante é considerado indicador de paleoambientes mariños. Como especie que cruzou a fronteira entre os biomas mariño e doceacuícola, é de particular interese para estudar os mecanismos ecofisiolóxicos e xenómicos subxacentes desta transición. Por outra banda, esta especie ten un grande potencial como organismo de modelo para estudar a evolución por especiación peripátrica.

A investigación segue a estratexia de Open Science (Open Access) do programa H2020 da UE, polo que se pode descargar libremente.
Esta publicación é un dos resultados acadados pola investigadora contratada ao abeiro do Programa de axudas de apoio á etapa inicial de formación posdoutoral Xunta de Galicia (Plan I2C, modalidade A). As algas vermellas coralinas son o eixe principal da súa investigación iniciada ao longo da súa tese doutoral sobre os fondos de maërl e defendida na Universidade da Coruña (2010). Neste senso, o grupo de investigación BIOCOST leva acadado financiamento para varios proxectos de investigación centrados neste ecosistema mariño protexido e que alberga unha grande diversidade nas costas galegas.

Artigo publicado: www.nature.com/articles/srep19642

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A toxoplasmose é un factor de risco para o envellecemento inflamatorio nos maiores

Un estudo da UDC demostra que as persoas cunha resposta de anticorpos máis forte á infección tiñan máis probabilidades de ser fráxiles

A UDC coordina o primeiro sensor automático en detectar zoonoses a escala mundial

O proxecto está liderado polo grupo do investigador Alejandro Criado. Chámase FLUFET e identifica un amplo espectro de obxectivos virais

Os investigadores galegos da trama saudita cobraron da empresa do intermediario dos árabes

Os dous empregados do Centro da Carne, cunha desenfreada produción científica, inscribíronse na universidade Rei Abdulaziz pese a desenvolver a súa carreira en Galicia

A Academia de Ciencias premia un estudo galego que foi portada da prestixiosa revista ‘Science’

O outro proxecto galardoado, tamén da USC, é un sistema de recuperación de información capaz de proporcionar resultados correctos e cribles