Explicación: esta semana choveron meteoros das leónidas sobre o planeta Terra, a chuvia anual de refugallos poeirentos procedentes da órbita do cometa 55P/Tempel-Tuttle. As leónidas atravesan esta composición do ceo nocturno desde un observatorio caseiro ao sur de Ontario. Os fotogramas individuais, gravados cunha cámara fixada a un trípode, captan a brillante actividade meteórica ao través da noite do 16/17 de novembro, máis ou menos un día antes do moi modesto máximo da chuvia. Os fotogramas rexístranse no campo de vista fixo, polo que os ronseis dos meteoros non están todos aliñados co campo estelar do fondo que se gravou esa noite cando Orión ficaba sobre o horizonte meridional. Como resultado, os ronseis non parecen provir do radiante da chuvia en Leo, situado fóra do bordo esquerdo do recadro estelar, algúns ronseis poderían ser dos meteoros das táuridas, unha chuvia tamén activa en novembro, ou incluso meteoros esporádicos, incluíndo un bólido brillante co seu reflexo preto do horizonte.
Leónidas e amigos
