Explicación: como pode unha estrela redonda crear unha nebulosa cadrada? Este misterio vén á luz ao estudar nebulosas planetarias coma IC 4406. A evidencia indica que probablemente IC 4406 é un cilindro oco, sendo a aparencia cadrada o resultado do noso punto vista ao ollar ao cilindro desde un lateral. Se olláramos IC 4406 desde enriba, probablemente se parecería á nebulosa Anel. Esta fotografía en cores simuladas é unha composición feita coa combinación de imaxes tiradas polo telescopio espacial Hubble en 2001 e 2002. O gas quente flúe ao exterior polas bases do cilindro, mentres os filamentos de po escuro e gas molecular amalloan as paredes laterais. A estrela principal responsable desta escultura interestelar pode acharse no centro da nebulosa planetaria. Nuns poucos millóns de anos, a única cousa que ficará visible en IC 4406 será unha estrela anana branca esmorecendo.
