Explicación: a fermosa galaxia Andrómeda é fotografada polos astrónomos do planeta Terra a miúdo. A galaxia espiral máis achegada a nós, tamén coñecida coma M31, é unha visión familiar cos seus corredores escuros de po, o brillante núcleo amarelado e os brazos espirais perfilados pola luz estelar azul. Este retrato excelente e cheo de cor, un mosaico de imaxes ben tiradas con filtros de banda ancha e estreita, do noso universo illa veciño ofrece características abraiantemente estrañas, como nubes febles avermelladas de gas hidróxeno ionizado no mesco campo de vista. Así e todo, as nubes de hidróxeno ionizado probablemente se atopan no primeiro plano da escena, ben dentro da nosa galaxia Vía Láctea. Poderían estar asociadas cos ubicuos cirros interestelares de po esparexidos centos de anos luz por riba do noso propio plano galáctico. Se estiveran aos 2,5 millóns de anos luz de distancia da galaxia Andrómeda serían enormes, como a propia Andrómeda cos seus 200.000 anos luz de diámetro aproximadamente.
