A revolución dixital do sector marítimo prepárase para dar un novo paso co lanzamento do nanosatélite SATMAR, desenvolvido integramente pola empresa galega Alén Space. A súa partida está prevista para o 21 de xuño a bordo dun foguete Falcon 9 de SpaceX, no marco da misión Transporter-14, que partirá desde a Base da Forza Espacial de Vandenberg, en California (Estados Unidos).
O obxectivo principal de SATMAR é demostrar nun escenario real a viabilidade do novo estándar VDES (VHF Data Exchange System), chamado a substituír nas comunicacións marítimas ao actual sistema AIS (Automatic Identification System). Esta nova tecnoloxía permite a transmisión de información bidireccional a través de satélite na banda VHF e é unha solución para os actuais problemas de saturación de redes que afectan as comunicacións navais, con melloras significativas nas operacións portuarias e na eficiencia, seguridade e sostibilidade do tráfico marítimo global.
O satélite, que operará sobre España e as súas augas circundantes, actuará como un banco de probas en órbita para validar distintos casos de uso dos estándares AIS e VDES, en colaboración coa Autoridade Portuaria da Baía de Alxeciras e con empresas relacionadas co sector marítimo español, como Oritia & Boreas.
A misión prevé demostrar distintas capacidades desta tecnoloxía chamada a transformar as comunicacións marítimas, como a transmisión de sinais VDES, a recepción de VDES e AIS, o mantemento da conectividade das embarcacións mesmo a grandes distancias da costa, a mellora na estimación de tempos de chegada, a emisión de alertas de seguridade marítima e o envío de información cifrada.
Un proxecto pioneiro para revolucionar o sector marítimo
“Estamos orgullosos de liderar un proxecto tan pioneiro como SATMAR”, explica Guillermo Lamelas, CEO de Alén Space. “É unha tecnoloxía que vai ter un impacto real no tráfico marítimo global. O estándar VDES vai ser unha revolución para o sector, porque permitirá dixitalizar as comunicacións marítimas, ofrecer novos servizos e aumentar a seguridade e eficiencia das operacións portuarias e das propias embarcacións”, sinala.
Ademais do seu propósito principal, SATMAR incorpora unha carga útil secundaria de monitorización do espectro que o converte nun verdadeiro laboratorio en órbita de radio definida por software (SDR). O satélite probará distintas tecnoloxías innovadoras para comunicacións de alta velocidade en banda S, así como para a monitorización e detección de interferencias de radiofrecuencia (RF) en bandas VHF, L e S.
As cargas útiles foron deseñadas para permitir a súa reconfiguración en órbita de forma remota, o que facilitará a adaptación das probas a medida que avance a misión.
SATMAR supón a continuación natural do proxecto SHIPMATE (Satellite Hybrid Information Protocol for MAritime TElecommunications), desenvolto previamente por Alén Space e Egatel en colaboración con Gradiant, e afianza o camiño cara á dixitalización das comunicacións marítimas desde o espazo.
O proxecto conta coa participación de Egatel e o financiamento de Ports 4.0, unha iniciativa de innovación de Portos do Estado e Autoridades Portuarias Españolas, que busca impulsar a transformación dixital do sector marítimo mediante o financiamento de proxectos disruptivos con potencial de aplicación práctica en contornas portuarias.
