Cinco novos pequenos satélites fabricados por Alén Space foron postos en órbita con éxito a bordo dun foguete Falcon 9 na misión Transporter-18 de SpaceX. Desenvolvidos para Sateliot, operador europeo de telecomunicacións por satélite, os satélites forman parte de Draconis, a súa nova misión para ampliar a capacidade da súa rede IoT #5G NTN e aumentar a frecuencia de conexión en zonas sen cobertura móbil terrestre.
Para Alén Space, unha empresa con sede en Nigrán, esta misión supón un novo fito na evolución das súas capacidades de produción de pequenos satélites. Tras os catro satélites fabricados para Sateliot en 2024, a compañía galega entregou agora cinco CubeSats 6U adicionais, cunha notable redución dos tempos de desenvolvemento e coa incorporación de novas capacidades técnicas. A madurez da plataforma permitiu deseñar e fabricar os satélites na metade do tempo requirido para a misión anterior. Desta forma, Draconis reforza a experiencia de Alén Space na produción en serie de pequenos satélites para constelacións comerciais.
Con esta misión, lanzada desde a Base da Forza Espacial de Vandenberg en California, Sateliot eleva a 11 o número total de satélites lanzados desde a súa fundación e avanza no despregamento comercial dunha tecnoloxía que xa foi validada con éxito.
Un sistema máis fiable e eficiente
O lanzamento permitirá reducir o intervalo de tempo entre os pases dos satélites e aumentará o número de oportunidades de conexión dispoñibles para os dispositivos. De media, o número de pases diarios duplicarase, mentres que o tempo de revisita reducirase á metade. Os cinco novos satélites incorporan melloras tecnolóxicas, entre elas unha carga útil optimizada e un sistema máis fiable e eficiente para o almacenamento de datos a bordo.
Os novos satélites tamén contan con versións melloradas do computador de a bordo e do sistema de control de actitude, que proporcionan maior estabilidade e permiten manobras en órbita máis eficientes, así como sistemas de memoria con maior resistencia ás duras condicións da contorna espacial, especialmente á radiación.
A telecomunicación no espazo
Os cinco satélites, que orbitan a unha altitude de 510 quilómetros, incorporan a tecnoloxía de conectividade desenvolvida por Sateliot para a súa rede IoT #5G NTN. Cada satélite mide 20 x 10 x 35 centímetros, pesa 10 quilogramos e ten unha vida útil operativa prevista de cinco anos.
Os satélites funcionan como torres de telecomunicacións no espazo, para ampliar a cobertura a través de acordos con operadores móbiles, que lles permiten ofrecer servizos da internet das Cousas (IoT) en zonas fóra do alcance das redes terrestres.
Exolaunch foi responsable da integración e a loxística da misión. O segmento terreo da constelación tamén conta con KSAT e Leaf Space como socios tecnolóxicos para as estacións de seguimento e control, mentres que Comfone proporciona servizos de conectividade IPX para permitir a interconexión segura da rede de Sateliot cos operadores móbiles.
A próxima xeración
Os cinco novos satélites forman parte dunha constelación contará con máis de 500 satélites e que evolucionará a través de sucesivas xeracións tecnolóxicas para avanzar desde o IoT masivo cara a servizos de maior capacidade e de misión crítica, incluídas capacidades D2D.
A partir de 2027, Tritó marcará o inicio desta evolución tecnolóxica, incorporando tecnoloxía 5G NR NTN e novas capacidades para comunicacións IoT seguras, de maior capacidade e resilientes, apoiadas nunha innovadora tecnoloxía de almacenamento e reenvío (store-and-forward) baseada en 3GPP Release 19.
Tritó tamén dispoñerá dunha arquitectura avanzada de antena dixital multifeixe con tecnoloxía de matriz en fase (phased-array), capaz de xerar e xestionar dinámicamente múltiples feixes de cobertura.
Unha infraestrutura europea
En palabras de Jaume Sanpera, CEO e cofundador de Sateliot, “a misión Draconis reflicte moi claramente o momento no que se atopa a nosa empresa. Validamos a tecnoloxía e agora estamos a aumentar a capacidade e a frecuencia de servizo para escalar o servizo xunto aos operadores móbiles. O noso obxectivo é converter a conectividade por satélite nunha extensión natural das súas redes alí onde non chega a cobertura terrestre e, sobre esa mesma infraestrutura 5G estandarizada e interoperable, evolucionar cara a servizos cada vez máis críticos e resilientes. Estamos a construír unha infraestrutura europea de telecomunicacións baseada en tecnoloxía propia e no estándar 3GPP, con ambición global”.
Guillermo Lamelas, director xeneral de Alén Space, engadiu: “Esta misión supón un novo paso clave na nosa estreita colaboración con Sateliot e no desenvolvemento do ecosistema europeo #5G NTN. Ver como estes cinco satélites entran en órbita confirma a nosa capacidade para asumir retos cada vez máis complexos e para entregar a calidade e fiabilidade necesarias para as misións con satélites máis esixentes”.
