Ao longo de toda a historia da humanidade, a ciencia e a innovación teñen sido pancas de desenvolvemento fundamentais para contribuír a sociedades máis prósperas, máis saudables, máis sabias e máis eficientes. Chegamos do pasado a este punto do presente grazas aos seus avances, e está claro que gran parte do futuro dependerá tamén dos seus éxitos.
Os grandes desafíos da sociedade de hoxe poden atopar reposta e solucións no traballo de moitos científicos e científicas. Non fai falta botar a vista moito tempo atrás para comprobalo: as vacinas foron o mellor remedio para unha pandemia que asolou o mundo. Pero os seus fitos son tamén fundamentais para outras cuestións vitais, como afrontar o cambio climático con enerxías verdes ou para avanzar no tratamento e supervivencia de enfermidades como o cancro.
Medios como Gciencia desenvolven un labor de divulgación fundamental, porque achegan á cidadanía, de forma comprensible, todo o que sucede na ciencia
Os novos descubrimentos e as súas aplicacións vanse sucedendo a un ritmo de vertixe, e a sociedade precisa entender e coñecer esas transformacións para poder formar parte delas. É aí onde medios como Gciencia desenvolven un labor de divulgación fundamental, porque achegan á cidadanía, de forma comprensible, todo o que sucede na ciencia; porque poñen en valor o labor impagable dos científicos; e porque sitúan o foco sobre unha Galicia que acubilla moita ciencia e profesionais de primeiro nivel. Non en van, nos últimos anos tense producido un gran auxe do noso ecosistema de I+D+i, con especial preponderancia de sectores como o aeroespacial, a biotecnoloxía ou as tecnoloxías cuánticas, campos nos que Galicia está chamada a desempeñar un papel referente. Pero, por suposto, a ciencia é aínda moito máis: é tamén a que nace nas universidades, ou as vocacións dos nenos e nenas que, desde os colexios, aspiran a ser como os seus referentes.
Polo tanto, garantir o futuro da ciencia é un deber inescusable que pasa por apoiar aos investigadores, por asegurarnos de que haxa canteira e por explicar e transmitir os seus logros. Se garantimos o futuro da ciencia, estaremos tamén asegurándonos un desenvolvemento sostible, un mundo mellor e un coñecemento máis profundo sobre todo o que nos rodea. Estaremos, ao fin e ao cabo, salvagardando o noso propio futuro. Sigamos facéndoo todos xuntos.
