O nacemento de Gciencia hai 10 anos, unha iniciativa novidosa, ambiciosa, arriscada e eu diría cunha boa dose de romanticismo, foi no seu día unha moi boa nova para a ciencia galega. Difundir os principais fitos alcanzados por científicas e científicos galegos, e ademais en galego, e que tivera unha receptividade significativa a nivel xeral da sociedade era un reto difícil de atinxir.
Hoxe, transcorridos dez anos, a boa nova é incluso máis boa. Supón, nada menos, que a consolidación dun modelo orixinal, creativo e con ampla aceptación social que foi recoñecido a través dos premios máis prestixiosos de xornalismo científico a nivel galego e español. Gciencia é hoxe un elemento dinamizador relevante do sistema galego de ciencia e tecnoloxía.
Gciencia é hoxe un elemento dinamizador relevante do sistema galego de ciencia e tecnoloxía
A divulgación científica ten a dupla misión de informar á sociedade sobre temas de interese xeral (saúde, medio ambiente, tecnoloxía, economía…) pero tamén un papel concienciador, transmitindo o rol da ciencia como motor, como ferramenta imprescindible de cambio económico e social. E nestas dúas orientacións, o traballo de Gciencia está conseguindo, paseniñamente pero con solidez, transmitir á sociedade galega os valores científicos, obxectivo que compartimos plenamente dende a Real Academia Galega de Ciencias (RAGC).
Por isto mantemos con Gciencia unha moi estreita colaboración estable en varias iniciativas e proxectos, nomeadamente para a edición da revista A Ciencia en Galicia que nestes momentos ten unha moi notable difusión estando xa dispoñible en tódalas bibliotecas públicas (universitarias e municipais) de Galicia.
Parabéns e longa vida a Gciencia!
Parabéns a GCiencia. Como presidente do comité editorial da revista da RAGC “A Ciencia en Galicia” súmome ás louvanzas do meu presidente da RAGC e desexo que a nosa colaboración continue nos vindeiros anos.
Parabens a Tod@s por esta decada da comunicacion cientifica,natureza,universo etc…
PArABENS de❤.
E por ende a todalas persoas que que o fan posible e aos que o reciben.
¡ SAUDE!