Únete á nosa canle de Whatsapp
Este martes o campus de Ourense acolleu a presentación do libro de actas do I Congreso Internacional da Auga e o anuncio das principais liñas de traballo do que será a súa segunda edición, que estará dedicada nesta ocasión ás inundacións e ás secas e que terá lugar os días 27 e 28 de outubro. Tendo como socio na organización á Confederación Hidrográfica do Miño-Sil, os promotores deste foro internacional, que se enmarca dentro do proxecto de especialización do campus de Ourense como Campus da Auga, recalcan a importancia e a actualidade de abordar esta temática ante a crecente incidencia dos fenómenos extremos, como son as inundacións e as secas, provocados polo cambio climático.
Segundo explicou Moncho G. Gesteira, presidente do comité organizador do que será oII Congreso Internacional da Auga, a cita contará unha vez máis coa implicación do Concello e da Deputación de Ourense e da Xunta de Galicia. “O seu obxectivo será xuntar a investigadores de prestixio internacional para abordar os últimos avances na análise, prevención e mitigación de inundacións e secas”, sinalou. Para acadalo, o encontro estruturase en tres bloques, como son inundacións, secas e entes produtores/xestores. A cita organizarase de xeito paralelo á EGU Leonardo Topical Conference Series on the Hydrological Cycle, que do 25 ao 27 de outubro reunirá, baixo a organización do grupo EPhysLab da Universidade de Vigo, aos membros de EGU, a European Geosciences Union, dedicada ao estudo dos fenómenos da terra. Atendendo ao específico da temática elixida, os organizadores agardan que sexan arredor de 100 os participantes estatais e internacionais que asistan e 50 as comunicacións presentadas á segunda edición deste foro.
Máis información no seguinte enlace:
http://duvi.uvigo.es/index.php?option=com_content&task=view&id=11461&Itemid=2
