Trillas_en_citius

Enric Trillas imparte no CiTIUS da USC un seminario sobre lóxica borrosa, da que foi pioneiro en España

O catedrático de Ciencias da Computación e Intelixencia Artificial da Universidade Politécnica de Madrid, Enric Trillas, imparte esta semana no CiTIUS da USC o seminario ‘Cinco leccións de lóxica borrosa’, no que presenta as súas principais achegas ao campo da lóxica difusa.

Ao longo das cinco sesións nas que se desenvolverá o seminario, Trillas profundará na relación entre a lóxica difusa e as ciencias da computación, así como na súa aplicación a temáticas como o razoamento, a linguaxe ou a aritmética, entre outras.

O profesor Trillas, doutor honoris causa polas universidades de Santiago de Compostela e Navarra, foi pioneiro en España na lóxica difusa ou borrosa e un dos primeiros investigadores que se dedicaron a este ámbito da ciencia no contexto europeo, que centra o seu campo de traballo en tentar conseguir que as máquinas poidan imitar as formas de razoamento humanas.

Foi ademais presidente do Consello Superior de Investigacións Científicas (CSIC), director xeral e vicepresidente do Instituto Nacional de Técnica Aeroespacial (INTA), secretario xeral do Plan Nacional de Investigación Científica e Tecnolóxica, secretario da Comisión Interministerial de Ciencia e Tecnoloxía e presidente da compañía Ingeniería y Servicios Aeroespaciales (INSA).

Na traxectoria de Trillas constan máis de 200 publicacións e artigos científico-técnicos e foi galardoado cos premios máis importantes que se conceden no ámbito da lóxica difusa, ademais de ser posuidor da Orde ao Mérito da República Italiana, categoría de Grande Uffiziale, a Gran Cruz do Mérito Aeronáutico ou a Medalla Narcís Monturiol ao mérito científico e tecnolóxico.

Coloquios filosóficos
Aproveitando a súa estadía na cidade, o profesor Trillas participará o martes 28 nunha sesión dos Coloquios Filosóficos en Compostela que co tema ‘Conversas sobre a creatividade’ vai ter lugar ás 19:30 horas no Salón de Actos de Filosofía. Con el estarán tamén o neurocioentífico Carlos Acuña e o lingüista Guillermo Rojo.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.