Únete á nosa canle de Whatsapp
O Pazo da Cultura de Pontevedra acolle desde este xoves o XIII Congreso Internacional de Ciencias do Deporte e a Saúde, no que participan máis de 250 estudantes e profesionais deste eido. Durante as xornadas presentaranse máis dun centenar de investigacións e haberá seminarios nos que participan máis de 30 expertos de España, Arxentina, Cuba e Portugal.
Un dos relatores da xornada inaugural do xoves foi Guillermo Bortman, xefe dos servizos médicos do club de fútbol Boca Júniors, que alertou dos riscos de realizar actividade física de xeito imprudente sen as debidas precaucións. Bortman sinalou que o deporte pode ser “un disparador” de problemas para a saúde nas persoas que teñan cardiopatías. “Teñen dez veces máis risco de morte que unha persoa sa que faga a mesma actividade”.
Todos os anos falecen en España uns 130 deportistas por morte súbita
“O deporte mata?” era o título da conferencia de Bortman. O doutor iniciou relatando os múltiples beneficios que a actividade física ten para a saúde das persoas. Mais tamén, lembrando que en España falecen “aproximadamente uns 130 atletas de morte súbita cada ano, moitos deles persoas que teñen unha patoloxía cardiovascular previa e que se lanzan a facer deporte sen chequeos e controis”. De aí que o xefe médico de Boca Juniors, que na anterior edición deste congreso abordara precisamente a prevención da morte súbita, aludise no seu relatorio a diferentes estudos que constatan que para “aquelas persoas que teñen un problema cardiovascular e non o saben, o deporte termina sendo vez veces máis perigoso”.
Poñer de relevo que o que mata e “a neglixencia e a imprudencia das persoas” era o obxectivo dunha conferencia na que incidiu en diferentes problemáticas. Alertou, por exemplo, do consumo de substancias dopantes, que se subministran ao deportista “para sacar vantaxe competitiva, pero que moitas delas supoñen tamén un risco para a saúde mesma”, como podería ser o caso da EPO, unha hormona produtora de glóbulos vermellos que protagonizou varios casos de dopaxe no ciclismo e que supón “un risco de trombose”. Bortman aludiu tamén ao falecemento “sen explicación”, en 2015, de doce ex-xogadores de entre 45 e 65 anos da NBA, unha liga que “na época na que eles xogaban non contaba con ningún tipo de control antidoping”. Con este exemplo o conferenciante quería poñer de relevo que, máis aló da morte súbita, o uso deste tipo de substancias “ten consecuencias para o resto da vida”. De aí que incidise na importancia da loita contra o dopaxe, así como da necesidade de realizar controis médicos que permitan as persoas realizar unha actividade física adecuada ás súas características e estado de saúde.
O congreso arrincou cun minuto de silencio en memoria de Antonio Maceira, profesor da Facultade de Ciencias da Educación e do Deporte e membro do comité científico destas xornadas, falecido o pasado mes de marzo, como lembrou o presidente do comité organizador e profesor tamén deste centro, José Luis García Soidán.
Amais dos riscos da imprudencia na práctica do deporte, as xornadas ofrecen outras moitas perspectivas, “cunha forte compoñente social e formativa”, segundo sinalou o vicerreitor do campus, Juan Manuel Corbacho. Saúde e hixiene, ocio e tempo libre, didáctica da educación física, rendemento deportivo, xestión e lexislación deportiva e ciencias sociais, antropoloxía e psicoloxía constitúen as seis áreas de análise que abrangue este congreso, que finaliza o sábado.
