O proxecto de divulgación Xeoclip, impulsado por profesores de ciencias de centros de ensino de Galicia, ofrece unha viaxe fascinante a vista de paxaro polo litoral galego. O vídeo, publicado o 17 de maio co gallo do Día das Letras, fai un percorrido polos sistemas costeiros afectados pola ondada.
Desde A Lanzada, no istmo do Grove, o vídeo vai percorrendo as praias de sur a norte, enmarcadas na tipoloxía destes sistemas modelados ao longo do tempo pola acción do mar aberto. Praias como Corrubedo, Area Maior (Louro), Carnota, Reira e Trece (Camariñas), Traba e Laxe, A Barra do Anllóns, entre Ponteceso e Cabana, Baldaio, Doniños, Ponzos, Valdoviño, Morouzos o Augas Santas van desfilando desde as alturas.
A peza, composta de voos realizados durante o ano 2019, está realizada polo equipo de Xeoclip, que forman Alberto Fortes Novoa, Fernanda Moltó Roibal, Rocío Romar Roel e Xacobo de Toro Cacharrón. Ademais, o traballo conta coa colaboración do profesor ad honorem da USC, Augusto Pérez Alberti, experto no estudo da xeomorfoloxía litoral de Galicia.