Martes 19 Marzo 2024

Ciencia e Xacobeo conviven en Lugo no programa ‘BioRedes fai camiño’

A agrupación estratéxica de investigación do Campus Terra convoca actividades que relacionan ciencia, sector primario e rutas xacobeas

A Agrupación Estratéxica de Investigación do Campus Terra da USC BioRedes busca achegar e conectar a I+D+i que se desenvolve na sede universitaria luguesa coa contorna produtiva, social e cultural de Galicia a través das rutas xacobeas co proxecto ‘BioReDes fai camiño’, un programa incluído no plan de dinamización do Xacobeo 2021 ‘O teu Xacobeo’ promovido pola Consellería de Cultura e Turismo da Xunta de Galicia e que está estruturado en diversos ‘Camiños con ciencia’.

Os ‘Camiños con ciencia’, tal e como se denominan cada un dos roteiros representativos polo sector primario de Galicia organizados ao abeiro do proxecto ‘BioReDes fai camiño’, permitirán o aproveitamento de recursos naturais e culturais das diferentes rutas xacobeas para divulgar o coñecemento e fomentar o turismo científico. Este dobre obxectivo permitirá asemade mellorar as relacións co tecido produtivo e as redes de transferencia de coñecemento e divulgación científica, ademais de impulsar actividades turísticas ligadas á ciencia e respectuosas coa contorna, segundo explicou a profeosra da USC na Facultade de Veterinaria de Lugo e investigadora de BioReDes María Isabel Quiroga Berdeal.

Publicidade

O conxunto etnográfico de Mazo de Santa Comba acollerá unha actividade.

O proxecto ‘BioReDes fai camiño’ nace coa idea de facer que os Camiños de Santiago actúen como fío condutor para dar a coñecer a investigación que desenvolvemos os grupos de investigación agromados en BioReDes, ademais de afondar na conexión coa contorna produtiva, cultural, social e gastronómica de Galicia, relatou a tamén directora do Departamento de Anatomía, Produción Animal e Ciencias Clínicas Veterinarias da USC.

O primeiro Camiño con ciencia desenvolverase na capital luguesa o 27 de novembro. Esta acción, que se prolongará ao longo de toda a xornada e na que se agarda a participación de 50 persoas, entre as que figuran investigadores, creadores de opinión (xornalistas e divulgadores), xestores da administración, representantes do sector hostaleiro, profesionais de turismo, escolas de paisaxismo e turismo… permitirá facer unha visita guiada en formato interactivo polo río Rato. Durante este percorrido investigadores de áreas diversas, tales como Botánica, Xeología, Micoloxía ou Edafoloxía, descubrirán moitos dos segredos que agocha o patrimonio natural e etnográfico deste cauce fluvial e da súa contorna.

Unha visita ao Mazo de Santa Comba, na que se poderá apreciar un conxunto etnográfico excepcional, ademais de debater sobre as oportunidades de desenvolvemento económico sostible na contorna de Lugo, unha camiñada guiada por un treito do Camiño Primitivo desde a ponte romana ata a Casa de Saber e a conseguinte visita ao Museo Universitario A Domus do Mitreo son outras das actividades previstas neste primeiro ‘Camiño  con ciencia’, que chegará ao seu colofón cun evento gastro-científico-musical no mercado municipal de Quiroga Ballesteros.

A actividade coincidirá co congreso da mocidade investigadora de Galicia e Portugal no sector primario

Esta xornada gastro-artística, que conta coa colaboración da área de Participación e Servizos para a Veciñanza do Concello de Lugo, incluirá show cookings a cargo de prestixiosos chefs de Lugo que elaborarán propostas gastronómicas con produtos locais de tempada amparados baixo DOPs e IXPS. O programa inclúe asemade catas guiadas de queixos e viños, monólogos científicos, faladoiros e música ao vivo.

O evento gastro artístico programado no pimeiro ‘Camiño con ciencia’ organizado por BioReDes servirá asemade de acto de benvida a todos os investigadores mozos inscritos para participar no   I Congreso da Mocidade Investigadora en Produción Primaria Sostible e Calidade e Seguridade Alimentaria (JIPAS 2019). Este foro de divulgación e debate científico promovido por BioReDes e a Red Inmunogenom da USC desenvolverase os días 28 e 29 de novembro na Escola Politécnica Superior de Enxeñaría do Campus de Lugo e prevé congregar investigadores mozos de todo o Sistema Universitario Galego, así como doutros centros de investigación operativos na comunidade galega e noutras localizacións de España e de Portugal. O prazo de inscrición neste congreso está aberto ata o 26 de novembro.

O obxectivo deste evento científico é o de crear un foro de análise e debate acaído para que a mocidade investigadora poida presentar as súas pescudas e expoñer os seus traballos de investigación, ademais de intercambiar opinións, debater resultados científicos e mellorar a súas técnicas e habilidades para a presentación e defensa pública dos seus traballos e achegas.

O coordinador de BioReDes e da Red Inmunogenom da USC, o catedrático de Xenética Paulino Martínez Portela, sinala que JIPAS 2019 nace coa pretensión de converter en protagonista á mocidade investigadora, ao tempo que aspira a converterse nun espazo de intercambio e de conexión entre os diferentes grupos de investigación que traballan nos ámbitos da produción primaria sostible e de calidade e da seguridade alimentaria en España e Portugal.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un bólido cruza a costa de Lugo ata caer no Cantábrico

A segunda bóla de lume visible dende Galicia en apenas dúas semanas procedía da chuvia de estrelas das delta-leónidas

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC
00:03:30

I de ‘Inventio’: como o descubrimento da tumba do Apóstolo fixo marca Galicia

A partir do século IX Santiago de Compostela converteuse nun centro europeo económico e relixioso clave pola peregrinación xacobea

Novos achados revelan o carácter funerario da ‘roda’ de Adai, un xacemento único en Galicia

A descuberta dunha ola que se conserva completa e de pé sobre unha lousa suxiren que servía para actos rituais fundacional