As tres universidades galegas atópanse entre as dez máis comprometidas en España en uso e difusión de software libre. Así o reflicte o Ranking de Universidades en Software Libre (RuSL) deste ano, no que Galicia se sitúa como a segunda comunidade autónoma nesta clasificación liderada polas Illas Canarias.
A Universidade da Coruña é a que máis destaca entre as institucións de ensino superior de Galicia, no cuarto posto desta clasificación, na que se avalían un total de 76 universidades de todo o Estado. A Universidade de Santiago sitúase no sexto posto, mentres que a de Vigo se coloca no décimo lugar. Canda as galegas, neste top 10 aparece destacada como primeira a Universidade de Granada, seguida polas de La Laguna (2ª) e Las Palmas de Gran Canaria (3ª), ademais da de Sevilla (5ª), Zaragoza (7ª), Miguel Hernández de Elche (8ª) e Cádiz (9ª).
O compromiso das universidades españolas co software libre mídese mediante o seu Índice de Difusión del Software Libre (IDSL), que se calcula a partir de 65 indicadores que analizan 11 dimensións diferentes: administración, produción, colaboración externa, investigación, axuda, docencia, cultura en software libre, tecnoloxía, divulgación, webmetría e institución. A puntuación global de cada universidade é o índice IDSL, valor que indica o esforzo que realiza unha universidade por difundir o software libre, en relación á que máis o difunde. Así, a primeira clasificada ten un IDSL de 100 e o resto un valor entre 0 e 100 en proporción á promoción que realizan do software libre. Malia a boa posición das universidades galegas, os seus índices están lonxe das dúas primeiras nesta clasificación, especialmente a de Vigo.
Os resultados deste ano colocan unha vez máis á Universidade de Granada no primeiro posto, cun índice 100. Pero os autores do estudo salientan novidades no ranking como é a posición destacada das universidades canarias —no segundo e terceiro posto—, colocando ás Illas Canarias como a primeira comunidade en software libre de España, e o segundo posto de Galicia grazas a situar no top 10 as tres universidades da autonomía. A terceira comunidade más comprometida co software libre é Aragón, coa Universidade de Zaragoza como máximo expoñente.
Clasificación por universidades
| Posición | IDSL | Universidade |
|---|---|---|
| 1º | 100.00 | Universidad de Granada |
| 2º | 73.45 | Universidad de La Laguna |
| 3º | 52.28 | Universidad de Las Palmas de Gran Canaria |
| 4º | 49.14 | Universidade da Coruña |
| 5º | 44.76 | Universidad de Sevilla |
| 6º | 37.76 | Universidade de Santiago de Compostela |
| 7º | 34.65 | Universidad de Zaragoza |
| 8º | 33.60 | Universidad Miguel Hernández de Elche |
| 9º | 29.43 | Universidad de Cádiz |
| 10º | 26.98 | Universidade de Vigo |
Clasificación por comunidades autónomas
| Posición | IDSL | Comunidade Autónoma |
|---|---|---|
| 1º | 100.00 | Islas Canarias |
| 2º | 68.92 | Galicia |
| 3º | 53.11 | Aragón |
| 4º | 33.39 | Andalucía |
| 5º | 30.98 | País Vasco |
| 6º | 17.53 | Comunidad Valenciana |
| 7º | 15.23 | Extremadura |
| 8º | 14.60 | Madrid |
| 9º | 13.63 | Castilla La Mancha |
| 10º | 12.70 | Cataluña |
Universidade da Coruña
Entre as once dimensións diferentes coas que se avalía o compromiso das universidades co software libre, a UDC destaca en axuda, tecnoloxía e institución, e acada os peoes resultados en administración.
| Produción | 6º |
|---|---|
| Colaboración externa | 3º |
| Investigación | 7º |
| Axuda | 1º |
| Docencia | 6º |
| Cultura en Software | 5º |
| Tecnolóxía | 1º |
| Divulgación | 4º |
| Webmetría | 6º |
| Institución | 1º |
| Administración | 13º |
Universidade de Santiago de Compostela
O compromiso da USC co software libre tamén sobresae en tecnoloxía e institución, mentres que a súa peor valoración tamén é en administración.
| Produción | 10º |
|---|---|
| Colaboración externa | 4º |
| Investigación | 9º |
| Axuda | 2º |
| Docencia | 11º |
| Cultura en Software | 6º |
| Tecnoloxía | 1º |
| Divulgación | 12º |
| Webmetría | 7º |
| Institución | 1º |
| Administración | 16 |
Universidade de Vigo
A Uvigo destaca en tecnoloxía e acada resultados discretos en produción, investigación e docencia.
| Produción | 25º |
|---|---|
| Colaboración externa | 5º |
| Investigación | 29º |
| Axuda | 4º |
| Docencia | 20º |
| Cultura en Software | 7º |
| Tecnoloxía | 1º |
| Divulgación | 9º |
| Webmetría | 7º |
| Institución | 7º |
| Administración | 15º |
Esta clasificación é publicada anualmente polo Observatorio Tecnológico PortalProgramas baixo licenza creative commons e para a súa elaboración conta coa colaboración dun equipo de expertos en software libre, entre eles, Ricard Faura i Homedes, xefe do Servizo da Sociedade do Coñecemento na Dirección Xeral de Telecomunicacións e Sociedade da Información da Generalitat de Catalunya, e de responsables das principais universidades españolas, entre estes, Rafael Rodríguez, coordinador da Oficina de Software Libre do consorcio CIXUG das tres universidades galegas.
