A Universidade de Santiago de Compostela e a Asociación Hostalaría Compostela presentaron este mércores unha campaña de concienciación para promover o ocio responsable do alumnado, coincidindo coas primeiras semanas do curso académico, marcado pola pandemia da Covid-19. Nos últimos días, varios episodios difundidos a través dos medios de comunicación, con celebracións que incumprían a normativa destinada a conter a propagación do SARS-CoV-2, fixeron medrar a preocupación na universidade, principal institución universitaria en Galicia, con máis de 25.000 mozos e mozas matriculados (tendo en conta o Campus de Lugo).
No marco da campaña difundiranse a través das redes sociais unha serie de vídeos, protagonizados, entre outros, polo catedrático de Electromagnetismo Jorge Mira ou o gamer Jorge ‘Xheo‘ Díaz, entre outro material divulgativo, destinados a fomentar o cumprimento das normas ditadas polas autoridades sanitarias, o cal supón “a reconquista, a recuperación de espazos e hábitos que a Covid-19 nos foi roubando”, tal e como sinalou o director do Gabinete do Reitor e responsable da campaña, Carlos Toural.
Pola súa parte, o xerente da USC, Javier Ferreira, subliñou que a universidade conta con preto de 250 alumnos e alumnas voluntarias que ao longo do curso desenvolverán labores de concienciación entre os seus compañeiros e compañeiras para potenciar hábitos e condutas saudables, así como a responsabilidade individual de cada quen. “Debemos conciencialos da necesidade de cambiar os usos horarios”, apuntou en relación aos horarios de peche das instalacións hostaleiras como consecuencia das restricións sanitarias. Nesta mesma liña, Sara Santos, presidenta da Asociación Hostelería Compostela, e Sergio Fernández, membro da xunta directiva da entidade, destacaron que “o ocio responsable prodúcese nos establecementos de hostalaría”. “O ocio é necesario pero non podemos baixar a garda”, destacaron.
A intención é que esta campaña siga medrando e poda chegar a aglutinar a outros membros da comunidade universitaria, institucións e mesmo outras organizacións e asociacións. Neste senso, os impulsores da campaña destacaron que os bares e cafeterías son espazos seguros en tanto atópanse sometidos á observación do cumprimento das normas por parte das autoridades. “Non podemos relaxarnos xa que a Covid-19 non o fai”, concluíron os impulsores da campaña.
