O investigador do Centro de Investigación en Tecnoloxías de Telecomunicación da Universidade de Vigo (atlanTTic), Francisco Díaz Otero, vén de lograr a patente dun chip xerador cuántico de números aleatorios que poderá empregarse para encriptar e protexer información en internet, entre outros usos.
En Europa só existe outro chip con funcións similares a este, aínda que o deseñado por Díaz, que forma parte do grupo COM (Antenas, Radar e Comunicacións Ópticas), é máis sinxelo e seguro.
Aplicacións
Este chip poderá ser utilizado en simulacións médicas, estatísticas ou industriais que necesiten estes métodos, así como en loterías e apostas. A gran novidade do sistema ideado por Díaz é a incorporación da mecánica cuántica para xerar números aleatorios puros.
A día de hoxe son diversas as industrias que utilizan simulacións de modelos con números aleatorios, dende a loxística ata a mecánica, pasando polas animacións por ordenador e a farmacoloxía e análise de mostras. Ademais, este chip, que mide catro por seis milímetros, poderá ser patentado a partir da avaliación internacional en calquera país do mundo.
Currículo
Francisco Díaz é profesor de sinal e comunicacións ópticas na Escola de Enxeñaría de Telecomunicación da Universidade de Vigo, ademais de ser un dos investigadores promotores do Center for Quantum Comunications Technology (QCTech), un laboratorio especializado en comunicacións cuánticas e fotónica que se porá en marcha en Vigo nos próximos meses.
Así mesmo, Díaz Otero é tamén promotor de SPARC (Semiconductor InP Foundry and Advanced Research Centre), a futura fábrica e centro de I+D de Vigo especializada en semiconductores fotónicos e que conta co respaldo da Zona Franca de Vigo. Estas dúas infraestruturas colocarán a Vigo á vangarda en tecnoloxías de futuro das que se beneficiarán no só empresas senón a sociedade galega no seu conxunto.
