O QS World University Ranking, unha das clasificacións máis recoñecidas a nivel internacional sobre as mellores universidades do mundo, acaba de publicar os seus resultados de 2017. Esta lista analiza seis grandes áreas de coñecemento (Artes e Humanidades, Enxeñaría e Tecnoloxía, Ciencias da Vida e Medicina, Ciencias Naturais e Ciencias Sociais) e 48 disciplinas, asociadas a diversas Facultades, para elaborar unha clasificación das institucións académicas máis destacadas do mundo. No ránking xeral, dúas das tres universidades galegas aparecen na clasificación das 1.000 mellores do mundo. A USC, no intervalo 601-650, e a UDC entre o 801 e o 1000.
Nas áreas de Lingüística, Agricultura e Forestais, a USC está entre as 200 mellores
Por materias, a mellor posición para as institucións galegas conséguena as titulacións de Filoloxía, Farmacia, Matemáticas, a Escola Técnica Superior de Enxeñaría do Campus Vida (onde se imparte Enxeñaría Química) e a Escola Politécnica Superior de Enxeñaría do Campus Terra (con Enxeñaría Agrícola e Enxeñaría Forestal), todas elas da Universidade de Santiago. Así, en áreas como a Lingüística e Linguas Modernas, Farmacia e Farmacoloxía, Agricultura e Forestais ou Enxeñaría Química, a USC aparece entre as 250 mellores universidades do mundo.
A UVigo, aínda que non aparece na lista xeral entre as 1.000 mellores, tamén sitúa en lugares destacados a súa titulación de Química (351-400).
En canto ás grandes áreas de coñecemento, as mellores posicións para as universidades galegas son nas categorías de Ciencias Naturais (USC no 293), Artes e Humanidades (USC no 307), Ciencias Sociais (USC no 401-450), Ciencias da Vida e da Medicina (USC no 401-450) e Enxeñaría e Tecnoloxía (UVigo no 451-500).
Así é a situación das universidades galegas no QS World University Ranking:
Por grandes áreas:
Artes e Humanidades: USC no 307.
Ciencias Naturais: USC no 293.
Ciencias Sociais: USC no 401-450.
Enxeñaría e Tecnoloxía: UVigo no 451-500.
Ciencias da Vida e Medicina: USC no 401-450.
Por materias:
Lingüística: USC no 151-200.
Agricultura e Forestais: USC no 151-200.
Linguas Modernas: USC no 201-250.
Enxeñaría Química: USC no 201-250.
Farmacia e Farmacoloxía: USC no 201-250.
Matemáticas: USC no 251-300.
Educación: USC 251-300.
Ciencias do Medio Ambiente: USC no 251-300.
Medicina: USC no 351-400.
Química: UVigo e USC no 351-400.
Física e Astronomía: USC no 351-400.
Bioloxía: USC no 401-450.
