Unha anomalía meteorolóxica fai que esta semana fixera máis frío en Galicia que no Polo Norte. A onda de calor que está a vivir o Ártico, fronte ao frío siberiano que entrou en Europa occidental, fixo que o mércores O Cebreiro rexistrase 6,81 graos baixo cero. Mentres no Ártico as temperaturas non baixaron dos -5 graos.
A magnitude do fenómeno foi amosada polo investigador meteorolóxico Zack Labe, que leva anos traballando sobre as anomalías climáticas que están a afectar ao Círculo Polar Ártico.
Os resultados do seu estudo amosan que no Ártico a media diaria de temperaturas nos últimos días sitúase nos 10 graos baixo cero. Sen dúbida, falamos de frío. Pero o termómetro queda moi afastado das cifras que se ofrecen en latitudes máis meridionais, como Moscú. A capital rusa alcanzou o mércores os -25 graos.
O caso de Galicia forma parte do fenómeno. Porque fixo máis frío nalgúns puntos do país que no Polo Norte. Tal é o caso da estación de Meteogalicia en Pedrafita do Cebreiro, que rexistrou os 6,81 graos baixo cero esta semana, mentres no casquete polar non superaban os -5 graos de mínima.
O xornal The Washington Post xa alertou da situación esta semana , entrevistando a varios meteorólogos. E a conclusión é que o ecosistema climático europeo está conectado co do Ártico. De xeito que unha forte borrasca como a que vivimos faga que baixen as temperaturas no continente mentres o casquete polar norte recibe ventos mornos.
O problema radica en que a situación non é unha anécdota. Como revela Zack Labe nos seus estudos, os gráficos amosan anomalías climáticas cada vez máis frecuentes no Ártico, con menos días por baixo do punto de conxelación e unha temperatura que se ten elevado, nos últimos tres anos, nada menos que tres graos por riba da media do último século.
As consecuencias están tamén en que se derrete o xeo do Ártico, un problema complexo porque tamén contribúe a deixar nos océanos grandes masas de auga doce. De feito, foi noticia nos últimos días un buque mercante que fixo, por primeira en vez no inverno, a ruta polo norte. É un fito xamais acadado antes. Así que non é unha mera anécdota que faga máis frío no Cebreiro que no Polo Norte. Pola contra, o dato debería preocuparnos.
