O martes fíxose pública a primeira lista de admitidos nas universidades galegas e houbo moi poucas sorpresas. Os estudantes galegos xa saben que queren estudar e onde. A pesar de que, en conxunto, a rama sanitaria continúa sendo a máis demandada, as dobres titulacións gañan peso situándose entre as carreiras máis demandadas e coas notas de corte máis elevadas.
Concretamente destacan os dobres graos de Matemáticas e Física; Enxeñería Informática e Matemáticas ou Comunicación Audiovisual e Xornalismo. Carreiras que só se poden cursar na USC e que contan con 13.374, 12.954 e 12.745 de notas de corte respectivamente.
Pero, sen dúbida, a titulación que continúa a tendencia de ser, ano tras ano, a máis solicitada é a de Medicina. Grao que só se pode estudar no Campus de Santiago.
Das 163 titulacións ofrecidas en Galicia, 22 superan o 10 nas notas de corte
Os aspirantes a médicos, xunto cos alumnos que aspiran a formarse na especialidade de Enfermería nalgún dos sete campus galegos, suman máis de 5.000 aspirantes en listas de espera. Datos que confirman a tendencia á alza coa que conta a rama médica en Galicia.
Por outra banda, cabe destacar a gran demanda de prazas que tivo a nova titulación de Enxeñería Aeroespacial que se impartirá por primeira vez o próximo curso no campus de Ourense. O grao non só cubriu o número de prazas convocadas, senón que ten máis de 140 alumnos en lista de espera.
Entre as 163 titulacións totais que se ofrecen nas tres universidades galegas, 22 delas, contan cunha nota de criba superior a 10. Tal é o caso de Mecicina, Odontoloxía, Farmacia ou Veterinaria, carreiras da Universidade de Santiago. En Coruña, Ferrol e Lugo é Enfermería a carreira coa nota de corte máis alta, mentres que en Vigo e Pontevedra as carreiras ás que é máis difícil acceder son Tradución e Interpretación e Fisioterapia, respectivamente. En Ourense consegue ser Enxeñaría Aeroespacial a que criba cun número máis alto.
A oferta de titulacións do Sistema Universitario de Galicia pode consultarse aquí.
A listaxe de admitidos pode consultarse aquí.
